ყველის მწარმოებელთა ასოციაციის თავმჯდომარე რძის პროდუქტების ხარისხის კონტროლში სამი მხარის სახელმწიფოს, მწარმოებლისა და მომხმარებლის პასუხისმგებლობაზე საუბრობს. ანა მიქაძე-ჩიკვაიძე ,,კომერსანტთან“ ამბობს, რომ მომხმარებელი მწარმოებლის კეთილსინდისიერებაზე დამოკიდებული არ უნდა იყოს და თავად უნდა აკონტროლოს პროდუქტის ხარისხი. ის მიიჩნევს, რომ მომხმარებლის ინერტულობა მთავარი პრობლემაა, რადგან ისინი მწარმოებელს სათანადოდ არ სთხოვენ ხარისხისა და უვნებლობის დაცვას. ანა მიქაძე-ჩიკვაიძე ამბობს, რომ ერთადერთი ვინც დღეს პასუხს აგებს პროდუქტის ხარისხსა და უვნებლობაზე სახელმწიფოა, რომელიც კონტროლი და რეგულაციების გზით მონიტორინგს ახორციელებს.
„გაგიკვირდებათ და ხარისხზე პასუხისმგებელია მხოლოდ სახელმწიფო. სამყაროში, არც ერთ მატერიალურ სივრცეში კეთილსინდისიერი მწარმოებლის იმედად ჯერ არავინ დარჩენილა. რომ არა გაძლიერებული კონტროლი, გაძლიერებული რეგულაციები, გაძლიერებული მოთხოვნები, ჯარიმები და ადამიანების შემოწმება, იქამდეც კი, რომ მხილება თაღლითობაში ციხეში გაშვებას გამოიწვევს - ეს ყველაფერი რომ არ ხდებოდეს პერმანენტულად სამყაროში, ჩვენ ცოცხლები აღარ ვიქნებოდით. საბედნიეროდ, ეს უფლება მივეცით ჩვენ ხელისუფლებას, ყველგან აქვს ეს უფლება დელეგირებული ხელისუფლებას და პირველ რიგში ვისაც მოეთხოვება პასუხი, არის სახელმწიფო, აი მერე უკვე მწარმოებელი.
„ყვარლის ბაგას“ და „ჩირინას“ სკანდალში არის რძის მომპოვებელი კომპანია, ფერმა და შემდეგ უკვე პროდუქციის გამომშვები და მისი შემსყიდველი. ზოგადად სულ სამი მოთამაშე არის კულინარია და გასტრონომია-კვებაში: ეს არის პირველ რიგში ფერმერ-მწარმოებელი, მეორე რიგში სახელმწიფო და მესამე რიგში მომხმარებელი. ვნატრობ, რომ ამბიციური და პრეტენზიული მომხმარებელი გვყავდეს. ის განსაზღვრავს იმას, რომ ვერ გაბედავს სახელმწიფო და ვერც მწარმოებელი „შეასაღოს“ ის რაც მას ფულს მოუტანს და ჯანმრთელობას დამიზიანებს. აქ არის მომხმარებლის როლი. აქამდე მორიდებით ვამბობდი, მაგრამ არ არის სირცხვილი, რომ ეტიკეტი წავიკითხოთ. არ არის სირცხვილი, რომ გამადიდებელით ვიაროთ. ჩემი საქმე არ არის, არ ვარ ვალდებული, რომ ყველაფერი ვიცოდე. ძალიან დიდი ბოდიში, მაგრამ ქუჩაში, ასფალტზე, რომ ყველს იყიდი ვისი პასუხისმგებლობაა? იმის ვინც დგას და ყიდის? თუ იმის ვინც ყიდულობს, შვილებს აჭმევს და არ იცის რძის შემადგენლობა?“- აცხადებს ანა მიქაძე-ჩიკვაიძე.
ყველის მწარმოებელთა ასოციაციის თავმჯდომარე ამბობს, რომ ,,ყვარლის ბაგის“ მიერ საკვებში სკინტლის გამოყენების შესახებ გავრცელებული ინფორმაცია სიახლე არ არის. ანა მიქაძე-ჩიკვაიძის განცხადებით, ფერმაში ქათმის ფეკალიების გორები დიდი ხანია დგას და ამას ფერმაში ექსკურსიაზე ჩასული ადამიანები წლებია ხედავენ. მისივე თქმით, წლების წინ ევროკავშირმა და ამერიკამ საკვებში სკინტლის გამოყენება უსაფრთხოების დაცვის მიზნით აკრძალა. ანა მიქაძე-ჩიკვაიძე განმარტავს, რომ ქათმების გამოსაკვებად ზრდის ჰორმონს და ანტიბიოტიკებს იყენებენ, რაც უსაფრთხო არ არის არც ქათმის ხორცისა და კვერცხის მოხმარების შემთხვევაში.
,,ძალიან დიდი ბოდიში, მაგრამ ლაშა პაპაშვილი რომ საკვებში ურევს სკინტლს რაღაც დოზით ახლა გაიგეს? სკინტლის მთები და გორები რომ იდგა ლაშას ფერმაში, ახლა გაიგო მომხმარებელმა და საზოგადოებამ ან თუნდაც მაკონტროლებელმა? ახლა რომ ანეკდოტად გადაიქცა და წყევლიან და კრულავენ, სად იყო 20 წელი ეს საზოგადოება, რომელმაც არაერთხელ ნახა სკინტლი მის ფერმაში. იცით რამდენი ადამიანი ჩადიოდა იქ ექსკურსიაზე? სულ იდგა ის გორა იქ. ეს ახალი ამბავი არ არის, რომ რაღაც დოზით მონაწილეობს კვებაში. რატომ აკრძალა ევროპამ სკლინტი თავის საკვებში? რატომ აკრძალა ამერიკამ რამდენიმე წლის წინ? იმიტომ, რომ მოიმატა ქათმების კვებაში ზრდის ჰორმონმა. მოიმატა ანტიბიოტიკებმა, რადგან სახორცე ქათმების ბიზნესი გაიზარდა. რძე გავიგეთ, მაგრამ ვინმემ დავსვით კითხვა იმ ხორცსა და კვერცხს რომ ვჭამთ იქ რა არის? ქათმების გამოსაკვებად ზრდის ჰორმონს და ანტიბიოტიკებს იყენებენ, რაც უსაფრთხო არ არის არც ქათმის ხორცისა და კვერცხის მოხმარების შემთხვევაში’’- აცხადებს ანა მიქაძე-ჩიკვაიძე.
ანა მიქაძე-ჩიკვაიძე კომპანია ,,ბიუ-ბიუს“ („ჩირინა“) პასუხისმგებლობაზეც საუბრობს.
„ბიუ-ბიუ“ თავს იმართლებს და ამბობს, რომ ამას სასუქად ვყიდდიო. კარგი სასუქად ყიდდა. სასუქად, რომ შედის მინდორში და ასობით ჰექტარი, რომ ამით ნოყიერდება იმ ბალახს ვინ ჭამს? ძროხა ხომ. ანუ იმ სახით მაინც გადადის რძეში“- აცხადებს ის.
საქართველოში სკინტლის გამოყენება ძროხის საკვებში 2023 წლიდან აკრძალულია. ანა მიქაძე-ჩიკვაიძე ამბობს, რომ პრობლემის აღმოსაფხვრელად საჭიროა მომხმარებელმა მეტად გააკონტროლოს პროდუქციის ხარისხი და დარღვევის აღმოჩენის შემთხვევაში მწარმოებელი ამხილოს.
,,ამ ომში მოგებული არავინ არის. მათ შორის არც მომხმარებელი, რადგან ის პასიურია. მე რაში მეხება? რატომ მეხება მე? ასეთი პოზიცია აქვთ. ხარისხი უნდა აკონტროლოს სამეულმა. მომხმარებელმა, სახელმწიფომ და მწარმოებელმა. ამ ყველაფერს სულ უნდა ურტყამდეს მომხმარებელი, რომელიც უნდა გახდეს უპრეტენზიულესი და უამბიციურესი. პირდაპირი გაგებით, სულ ცხვირში უნდა ურტყა არაკეთილსინდისიერი პროდუქცია მომწოდებელს. ჩვენ ვართ ის არმია, რომელსაც ამისი გამოსწორება შეგვიძლია. უნდა გაბრაზდეს მომხმარებელი. გაბრაზდი და აჯანყდი მომხმარებელო. ბავშვს აჭმევ ამას. ხელში ლუპა უნდა ეჭიროს მომხმარებელს და პროდუქციაზე ძალიან წვრილად რომ არის დატანილი ინგრედიენტები და შემადგენლობა უნდა წაიკითხოს“, - აცხადებს ანა მიქაძე-ჩიკვაიძე.
