„პარი სენ-ჟერმენმა“ ჩემპიონთა ლიგის თასი ზედიზედ მეორედ აღმართა. ბუდაპეშტში გამართულ ფინალში პარიზულმა კლუბმა ლონდონის „არსენალი“ პენალტების სერიაში დაამარცხა და ევროპის ყველაზე პრესტიჟული საკლუბო ტურნირის გამარჯვებული გახდა.
ფინალური შეხვედრა უკიდურესად დაძაბული და დრამატული აღმოჩნდა. ანგარიში უკვე მე-6 წუთზე „არსენალის“ თავდამსხმელმა კაი ჰავერცმა გახსნა და ლონდონელები წინ გაიყვანა. მიუხედავად იმისა, რომ ბურთს მეტწილად „პარი სენ-ჟერმენი“ აკონტროლებდა, „არსენალი“ ორგანიზებულად იცავდა თავს და უპირატესობის შენარჩუნებას ცდილობდა.
გადამწყვეტი ეპიზოდი 65-ე წუთზე შედგა. ლონდონელთა საჯარიმოში ხვიჩა კვარაცხელიას წინააღმდეგ წესების დარღვევის შემდეგ მთავარმა არბიტრმა პენალტი დანიშნა. თერთმეტმეტრიანი ზუსტად უსმან დემბელემ შეასრულა და ანგარიში გაათანაბრა.
ძირითად და დამატებით დროში გამარჯვებული ვერ გამოვლინდა, რის შემდეგაც ყველაფერი პენალტების სერიამ გადაწყვიტა. ნერვების ომში უფრო ზუსტი პარიზული კლუბი აღმოჩნდა და მეტოქე 4:3 დაამარცხა.
ამრიგად, „პარი სენ-ჟერმენმა“ ჩემპიონთა ლიგის ტიტული ზედიზედ მეორედ მოიპოვა და კიდევ ერთხელ დაადასტურა, რომ ევროპული ფეხბურთის ერთ-ერთი მთავარი ძალაა. აღსანიშნავია, რომ გასულ სეზონში პარიზელებმა ფინალში მილანის „ინტერი“ 5:0 გაანადგურეს, წელს კი თასი გაცილებით რთულ და დაძაბულ ბრძოლაში შეინარჩუნეს.
პარიზული კლუბისთვის ეს გამარჯვება მხოლოდ სპორტული წარმატება არ არის. ბოლო წლებში PSG მსოფლიო ფეხბურთის ერთ-ერთ ყველაზე ძლიერ ფინანსურ პროექტად ჩამოყალიბდა. Deloitte Football Money League 2026-ის ანგარიშის მიხედვით, კლუბის შემოსავალმა 837 მილიონ ევროს მიაღწია, რაც ევროპაში მეოთხე საუკეთესო მაჩვენებელია. მხოლოდ მადრიდის „რეალი“, „ბარსელონა“ და მიუნხენის „ბაიერნი“ უსწრებენ პარიზელებს ფინანსური შემოსავლების მიხედვით.
Reuters-ის ინფორმაციით, 2024/25 წლების სეზონში PSG-მ რეკორდული ფინანსური შედეგი დააფიქსირა. კლუბის კომერციულმა შემოსავალმა 367 მილიონი ევრო შეადგინა, მატჩების დღიდან მიღებულმა შემოსავალმა კი 175 მილიონ ევროს მიაღწია.
ექსპერტების შეფასებით, კატარის სპორტული ინვესტიციების (QSI) ეპოქაში PSG უკვე არა მხოლოდ საფეხბურთო, არამედ გლობალური ბიზნესბრენდიც გახდა. Forbes-ის მონაცემებით, კლუბის ღირებულება დაახლოებით 4.6 მილიარდ დოლარს აღწევს და მსოფლიოს ყველაზე ძვირად ღირებულ საფეხბურთო კლუბებს შორის ერთ-ერთია.
შეგახსენებთ, რომ გასულ სეზონში „პარი სენ-ჟერმენმა“ ჩემპიონთა ლიგის ფინალში მილანის „ინტერი“ 5:0 დაამარცხა, ხოლო წელს ტიტული გაცილებით მძიმე და დრამატულ ბრძოლაში შეინარჩუნა.
წყარო:
Deloitte Football Money League 2026 — https://www.deloitte.com/uk/en/services/consulting-financial/analysis/deloitte-football-money-league.html
