პორტუგალიაში მეცნიერებმა ბიოპლასტიკის წარმოების ახალი მეთოდი შეიმუშავეს, რომლისთვისაც ხახვის ქერქს იყენებენ. იდეა ეფუძნება აგროსასურსათო ნარჩენების გადამუშავებას და ეკოლოგიურად სუფთა შესაფუთი მასალების შექმნას.
ავეიროს უნივერსიტეტის მკვლევარებმა დაადგინეს, რომ დაფქული ხახვის ქერქი შეიძლება პირდაპირ დაემატოს ბიოპლასტიკის მასალას, სპეციალური ქიმიური დამუშავებისა და რთული გაწმენდის პროცესების გარეშე. შედეგად მიღებული მასალა უფრო გამძლეა, უკეთ იცავს ტენსა და აირებისგან და დამატებით ანტიოქსიდანტური თვისებებიც აქვს.
მკვლევრებმა ბიოპლასტიკის საფუძვლად გამოიყენეს კარტოფილის გადამუშავების შედეგად მიღებული სახამებლის ნარჩენები, ხოლო ხახვის ქერქი მასალის გასაძლიერებლად დაამატეს. კვლევამ აჩვენა, რომ ასეთი ბიოპლასტიკი უფრო მდგრადია წყლის მიმართ და შესაფუთი მასალების წარმოებისთვის პერსპექტიულ ალტერნატივად შეიძლება იქცეს.
მეცნიერების შეფასებით, ეს მიდგომა სრულად ერგება ცირკულარული ეკონომიკის პრინციპებს, რადგან ნარჩენები ნედლეულად გარდაიქმნება და მცირდება ნავთობზე დაფუძნებული პლასტიკის გამოყენების საჭიროება.
მსოფლიოში ყოველწლიურად 98 მილიონ ტონაზე მეტი ხახვი იწარმოება. მკვლევართა მონაცემებით, დაახლოებით 5% ქერქის სახით ნარჩენად რჩება, რაც ასობით ათასი ტონა გამოუყენებელ მასალას ნიშნავს. სწორედ ამ ნარჩენის გამოყენება სურთ მეცნიერებს ახალი თაობის ბიოპლასტიკის წარმოებაში.
კვლევის ავტორები მიიჩნევენ, რომ ხახვის ქერქზე დაფუძნებულ ბიოპლასტიკს მომავალში შეიძლება მნიშვნელოვანი როლი ჰქონდეს საკვების შესაფუთი მასალების, ეკოლოგიური შეფუთვების და მდგრადი წარმოების განვითარებაში.
წყარო:
https://euro-pulse.ru/news/v-portugalii-pridumali-kak-delat-bioplastik-iz-lukovoj-sheluhi/
