არაბეთის გაერთიანებულ საამიროებში მცხოვრები ქართველი ემიგრანტები საქართველოში მიმდინარე მოვლენებთან დაკავშირებით განცხადებას ავრცელებენ და პროევროპულ პროტესტს უერთდებიან. ემიგრანტები ასევე გმობენ მშვიდობიან მოქალაქეებზე ძალადობას და წერენ, რომ ევროატლანტიკური ინტეგრაციის კურსი წარმოადგენს ქართველი ერის ისტორიულ არჩევანს. როგორც განცხადებაში ვკითხულობთ, არჩევნების გაყალბება და შესაბამისად, შედეგები არ ასახავს საქართველოს მოქალაქეთა ნებას.
"არაბეთის გაერთიანებულ საამიროებში მცხოვრები საქართველოს მოქალაქეები (ემიგრანტები) ვაცხადებთ რომ:
- საქართველოს კონსტიტუცია წარმოადგენს ქვეყნის ფუნდამენტურ დოკუმენტს და მისი ნებისმიერი ფორმით დარღვევა წარმოადგენს დანაშაულს ქვეყნისა და ერის წინაშე;
- დადასტურებულად განხორციელდა არჩევნების გაყალბება, შესაბამისად არჩევნების შედეგები არ ასახავს საქართველოს მოქალაქეთა უმრავლესობის ნებას. ამასთან “ხელისუფლებამ” დაარღვია მთელი რიგი სამართლებრივი ნორმები, რაც თვითგამოცხადებულ პარლამენტსა თუ მის მიერ დანიშნულ თანამდებობის პირებს ხდიან არალეგიტიმურს.
- ევროატლანტიკური ინტეგრაციის კურსი წარმოადგენს ქართველი ერის ისტორიულ არჩევანს და ერთადერთ საშუალებას საქართველოს ეკონომიკური, დემოკრატიული და უსაფრთხო განვითარების გზაზე.
- მიუღებელია ის ძალადობა, რომელიც ბოლო დღეების განმავლობაში განხორციელდა საქართველოში და ორმაგად მიუღებელია მშვიდობიანი მომიტინგეების მიმართ ასეთი სასტიკი, არაადამიანური ძალადობრივი მოპყრობა.
ჩვენ სოლიდარობას ვუცხადებთ:
- ყველა მოქალაქეს, ვინც ქუჩაში მშვიდობიანად აპროტესტებს საქართველოს კონსტიტუციისა და არჩევანის თავისუფლების დარღვევის ფაქტს;
- ყველა მოქალაქეს, ვინც დღეს იცავს ჩვენი სამშობლოს ევროპული, დემოკრატიული განვითარების პერსპექტივას.
- ყველა საჯარო მოხელეებსა თუ ძალოვანი სტრუქტურის წარმომადგენლებს ვინც გაემიჯნა “ხელისუფლების” ანტიკონსტიტუციურ გადაწყვეტილებასა და ძალადობას.
მადლობას ვუხდით თითოეულ მათგანს, ჩვენი და ჩვენი შვილების ნათელი მომავლისათვის თავდადებისათვის",- წერია განცხადებაში.
ამ წუთებში თბილისის სახელმწიფო უნივერსიტეტის ეზოში აქციის მონაწილეები შეიკრიბნენ. გადაკეტილია მელიქიშვილის ქუჩა. აქციის მონაწილეების მოთხოვნა კვლავ უცვლელია: ახალი არჩევნების დანიშვნა და პროტესტის დროს დაკავებული მოქალაქეების გათავისუფლება.
ცნობისთვის, ომბუდსმენის შეფასებით, სამართალდამცავი ორგანოებმა აქციის არაპროპორციული ძალის გამოყენებით შლიან მშვიდობიან აქციას მაშინ, როცა არ არსებობს მისი დაშლის და შეკრების თავისუფლებაში ჩარევის სამართლებრივი საფუძველი.
შეგახსენებთ, ცხრა ღამეა, საქართველოს პარლამენტთან ევროინტეგრაციის მხარდამჭერი აქცია მიმდინარეობს. დემონსტრანტები აპროტესტებს მთავრობის გადაწყვეტილებას, 2028 წლის ბოლომდე მოხსნან დღის წესრიგიდან საქართველოს ევროკავშირში გაწევრებაზე მოლაპარაკებების დაწყება. აქციის მონაწილეტა ნაწილი ითხოვს 2024 წლის 26 ოქტომბრის საპარლამენტო არჩევნების საერთასორიშო გამოძიებას და ახალ არჩევნებს.
ყოველდღე აქციის მსვლელობისას მობილიზებულია სპეცდანიშნულების ბრიგადები. შინაგან საქმეთა სამინისტრო აკავებს აქციის მონაწილებს. სპეცრაზმმა აქციის მონაწილეების წინააღმდეგ რამდენჯერმე გამოიყენა წყლის ჭავლი და ე.წ. გაზის კაფსულები. მოქალაქეები პიროტექნიკის გამოყენებით ცდილობდნენ, თავი დაიცვან ძალოვნების შემოტევისგან.
დედაქალაქის გარდა, საპროტესტო აქციები მიმდინარეობს რეგიონებშიც: ზუგდიდში, ქუთაისში, ხაშურში, გორში, საჩხერეში, ახმეტაში.
პრეზიდენტ სალომე ზურაბიშვილის შეფასებით, მასობრივი პროტესტი ეროვნულ დაუმორჩილებლობაში იზრდება. მისივე შეფასებით სახეზეა პოლიტიკური კრიზისი. პრეზიდენტი ამბობს, რომ ის პოლიტიკურ პროცესებს სათავრეში ჩაუდგება, რადგან ახლა პრეზიდენტის აპარატი ერთადერთი დამოუკიდებელი, ლეგიტიმური ინსტიტუტია, რომელიც ქვეყანაში დარჩა.
საქართველოსთან სტრატეგიული პარტნიორობა შეაჩერა აშშ-მა, რაც, სპეციალისტების შეფასებით, ნიშნავს იმას, რომ "ქართულმა ოცნებამ" ჰაერში დაკიდა ქვეყნის თავდაცვისუნარიანობა, შეერთებულ შტატებთან სავაჭრო ურთიერთობა, განათლების პროგრამები და არაღიარების პოლიტიკა.
მიმდინარე პოლიტიკური პროცესების ეკონომიკურ რისკებზე ალაპარაკდა ბიზნესი. მთავრობის ანტიდასავლური პოლიტიკის ეკონომიკურ საფრთხეზე დიდი ხანია საუბრობს სატრანსპორტო დერეფნის კვლევის ცენტრის პრეზიდენტი პაატა ცაგარეიშვილიც. მისი თქმით, დასავლელი პარტნიორები 10 მილიარდი დოლარის დონაციას ახდენენ საქართველოს ეკონომიკაში სხვადასხვა პროექტების დაფინანსებით, რომელთა შეწყვეტა ქვეყანას ეკონომიკურად დაანგრევს.
ფინანსურ და ეკონომიკურ პრობლემებს პროგნოზირებენ ფინანსისტებიც.
უფასურდება ლარი და სპეციალისტები ეროვნული ვალუტის კურსის ვარდნას მომავალშიც პროგნოზირებენ, თუ მასზე პოლიტიკური წნეხი არ მოიხსნება.
მთავრობა ეკონომიკურ და ფინანანსურ პრობლემებს არ აღიარებს და ოპტიმისტურადაა განწყობილი.
ნეგატიური მოლოდინები აქვს ექსპორტიორებს.
პოლიტიკური ესკალაციის სწრაფად განმუხტვის გარეშე, კრიზისს პროგნოზირებს ტურიზმის სფეროც და მისი მომიჯნავე სექტორები, ავიაცია, სტუმარ-მასპინძლობა და სხვა.
