S&P Global Ratings-მა საქართველოს 2026 წლის საშუალო წლიური ინფლაციის პროგნოზი 5.1%-მდე გაზარდა. თებერვალში გამოქვეყნებულ შეფასებაში საერთაშორისო სარეიტინგო სააგენტო მიმდინარე წელს 3.5%-იან ინფლაციას პროგნოზირებდა.

7 აგვისტოს გამოქვეყნებულ შეფასებაში S&P ინფლაციური წნეხის ზრდას, სხვა ფაქტორებთან ერთად, სურსათის, ტრანსპორტისა და კომუნალური მომსახურების გაძვირებას უკავშირებს. სააგენტოს მოლოდინით, საბაზისო ეფექტების თანდათან ამოწურვისა და შიდა მოთხოვნის ნორმალიზების ფონზე ფასებზე ზეწოლა მომავალ პერიოდში შესუსტდება. ამასთან, ახლო აღმოსავლეთში გეოპოლიტიკური ვითარება და ენერგორესურსების ფასები ინფლაციის შემცირების პროცესისთვის რისკად რჩება.

საქსტატის ოფიციალური მონაცემებით, 2026 წლის ივლისში საქართველოში წლიურმა ინფლაციამ 5.5% შეადგინა. ივნისში მაჩვენებელი 5.8% იყო. შესაბამისად, ინფლაცია კვლავ მნიშვნელოვნად აღემატება საქართველოს ეროვნული ბანკის 3%-იან მიზნობრივ მაჩვენებელს.

S&P Global Ratings-მა ამავე შეფასებით საქართველოს გრძელვადიანი სუვერენული საკრედიტო რეიტინგი „BB“ დონეზე დატოვა, ხოლო რეიტინგის პერსპექტივა „სტაბილურიდან“ „პოზიტიურამდე“ გააუმჯობესა. სააგენტომ საქართველოს 2026 წლის ეკონომიკური ზრდის პროგნოზიც გაზარდა და ახლა 6.4%-იან ზრდას ელოდება.

წყაროები:


https://www.spglobal.com/ratings/en/regulatory/article/-/view/type/HTML/id/3607760


https://www.spglobal.com/ratings/en/regulatory/article/-/view/sourceId/101668344


https://www.geostat.ge/en/modules/categories/26/cpi-inflation