საქართველოს მთლიანმა საგარეო ვალმა 2026 წლის 30 ივნისის მდგომარეობით 28.2 მლრდ აშშ დოლარი შეადგინა, რაც ბოლო ოთხი კვარტლის მთლიანი შიდა პროდუქტის 69.3%-ს შეადგენს. ამის შესახებ სტატისტიკურ მონაცემებს საქართველოს ეროვნული ბანკი აქვეყნებს.
2026 წლის მეორე კვარტალში ქვეყნის მთლიანი საგარეო ვალი 670 მლნ დოლარით გაიზარდა. მათ შორის, ოპერაციული ცვლილებების შედეგად ვალი 627.7 მლნ დოლარით, ფასის ცვლილებების გამო 28.2 მლნ დოლარით, ხოლო საკურსო ცვლილებების შედეგად 15.6 მლნ დოლარით გაიზარდა. სხვა ცვლილებების შედეგად საგარეო ვალი 1.5 მლნ დოლარით შემცირდა.
სახელმწიფო საგარეო ვალმა 11.3 მლრდ დოლარი შეადგინა, რაც მშპ-ის 27.7%-ია. მათ შორის, სამთავრობო სექტორის საგარეო ვალი 9.1 მლრდ დოლარია, ეროვნული ბანკის ვალდებულებები 733.9 მლნ დოლარს შეადგენს, სახელმწიფო საწარმოების ობლიგაციები კი 483 მლნ დოლარს, ხოლო სესხები 907.2 მლნ დოლარს.
საბანკო სექტორის საგარეო ვალი 10.8 მლრდ დოლარს შეადგენს, სხვა სექტორების საგარეო ვალი 4.2 მლრდ დოლარია, კომპანიათაშორისი ვალი კი 3.3 მლრდ დოლარს შეადგენს. მთლიანი საგარეო ვალის 83.1% უცხოურ ვალუტაშია დენომინირებული.
ამასთან, საქართველოს წმინდა საგარეო ვალმა 30 ივნისის მდგომარეობით 12.2 მლრდ დოლარი შეადგინა, რაც ბოლო ოთხი კვარტლის მშპ-ის 29.9%-ია. სახელმწიფო სექტორის წმინდა საგარეო ვალი 4.1 მლრდ დოლარს შეადგენს, ანუ მშპ-ის 10.1%-ს.
2026 წლის მეორე კვარტალში ეროვნული ბანკის საგარეო ვალი 38.9 მლნ დოლარით შემცირდა. კვარტლის ბოლოს ეროვნული ბანკის მთლიანმა საგარეო ვალდებულებებმა 733.9 მლნ დოლარი შეადგინა. აქედან 470.9 მლნ დოლარი განაწილებული ნასესხობის სპეციალური უფლებაა (ნსუ), რომელსაც დაფარვის ვადა არ აქვს და მისი გადახდის ვალდებულება, პრაქტიკულად, არ დადგება, სანამ საქართველო საერთაშორისო სავალუტო ფონდის წევრია.
