Galt & Taggart-ის ეკონომისტი ლაშა ქავთარაძე აცხადებს, რომ ქვეყნის სავალუტო რეზერვების ზრდისა და მიმდინარე ანგარიშის დეფიციტის რეკორდულად დაბალი მაჩვენებლის ფონზე შესაძლოა, საერთაშორისო საკრედიტო კომპანიებმა საქართველოს სუვერენული რეიტინგი გაზარდონ.
"საერთაშორისო რეზერვებს დეკემბერში რეკორდულად მაღალი მაჩვენებელი დაფიქსირდა და 6.2 მილიარდს მიაღწია. წინა თვესთან შედარებით ისინი 343 მილიონით გაიზარდა. რეზერვების ეს ცვლილება უმეტესწილად კვლავ Bmatch-ის პლატფორმაზე განხორციელებული შესყიდვებით იქნება განპირობებული, რის შესახებაც ინფორმაცია ჯერჯერობით არ გვაქვს 26 იანვრამდე.
თუმცა რაც უკვე იკვეთება, არის ის, რომ ოქროს ფასის ცვლილების შედეგად რეზერვები დამატებით დაახლოებით 41 მილიონით გაიზარდა. ასევე, რეზერვების ცვლილება დაკავშირებულია სხვა სავალუტო და საბანკო-სამთავრობო ოპერაციებთან.
ის ფაქტი, რომ რეზერვები რეკორდულად გაიზარდა, მიუთითებს, რომ მათი მოცულობა ფაქტობრივად ადეკვატურ დონეზეა. საერთაშორისო საინვესტიციო ორგანიზაციები ამ მაჩვენებელს ძალიან ყურადღებით აკვირდებიან, რადგან საკრედიტო რეიტინგის გაუმჯობესებაში მას მნიშვნელოვანი როლი აქვს.
ამასთან ერთად არსებობს კიდევ ერთი მაჩვენებელი მიმდინარე ანგარიშის ბალანსი, რომლის მიხედვითაც 2025 წელს რეკორდულად დაბალი დონე დაფიქსირდება. ჩვენი მოლოდინია, რომ დეფიციტი დაახლოებით 3.2%-ის ფარგლებში იქნება.
ფაქტობრივად, ამ ორი ინდიკატორის გათვალისწინებით იზრდება ალბათობა, რომ საკრედიტო რეიტინგში გაუმჯობესება გვქონდეს. თუმცა არსებობს სხვა ნიუანსებიც, რომელთაც სარეიტინგო კომპანიები ყურადღებას მიაქცევენ", - თქვა ქავთარაძემ "საქმიან დილაში".
