საქართველოს მიერ რუსეთის ფედერაციის მოქალაქეებისთვის სამთვიანი სავიზო რეჟიმის შესაძლო შემოღებამ შესაძლოა შეამციროს რუსი ტურისტების ინტერესი ამ ქვეყანაში მოგზაურობის მიმართ. ამის შესახებ TASS-ს განუცხადა ტუროპერატორი Space Travel-ის ხელმძღვანელმა და რუსეთის ტუროპერატორთა ასოციაციის (ATOR) ვიცე-პრეზიდენტმა გამავალი ტურიზმის საკითხებში არტურ მურადიანმა.
გუშინ, საქართველოს პრეზიდენტმა სალომე ზურაბიშვილმა მოუწოდა მთავრობას მოიწვიოს ეროვნული უშიშროების საბჭოს სხდომა, სადაც განიხილება რუსეთის მოქალაქეებისთვის სამთვიანი სავიზო რეჟიმის შემოღების საკითხი. სწორედ ამ თემას გამოეხმაურა რუსული ტუროპერატორი.
„საქართველოს პრეზიდენტი გეგმავს რუსებისთვის ვიზების ინიციირებას და არ შეიძლება ამან არ დაარტყას მომავალ ტურისტულ მოთხოვნას, რადგან საქართველო ცხადია არ იქნება ჩვენთვის ისეთი მიმზიდველი, როგორიც ახლა“,- თქვა მურადიანმა.
ცნობისთვის, რუსეთის პრეზიდენტმა ვლადიმერ პუტინმა ხელი მოაწერა განკარგულებას საქართველოს მოქალაქეებისთვის სავიზო რეჟიმის გაუქმების შესახებ 15 მაისიდან. მეორე განკარგულებით, მან გააუქმა რუსული ავიაკომპანიების ფრენების და საქართველოში ტურების გაყიდვის აკრძალვა, რომელიც 2019 წლიდან მოქმედებდა.
რუსეთის ფედერაციის ტრანსპორტის სამინისტროს პრესსამსახური იტყობინება, რომ რუსულმა ავიახაზებმა დაიწყეს მზადება რუსეთ-საქართველოს შორის ფრენების აღდგენისთვის. შიდა გადამზიდავები ყოველკვირეულად შვიდ პირდაპირ რეისს განახორციელებენ მოსკოვიდან საქართველოს დედაქალაქ თბილისის მიმართულებით რუსული წარმოების გემებით.
