რებრენდინგის ბრიფი სამუშაო მაგიდაზე დევს. შრიფტი არჩეულია. ფერების პალიტრა მზადაა. ლოგოს ვარიაციები დასრულებულია. ესე იგი, საქმე გაკეთებულია, ხომ ასეა? თუმცა სინამდვილეში – არც კი დაწყებულა. Frontify-ს უახლესი ანგარიში ცხადყოფს, რომ ბრენდის იდენტობის გადახედვის დროს ეს მიდგომა უკვე საკმაოდ მოძველებულია.
თანამედროვე ბრენდინგი აღარ არის სტატიკური ვიზუალური ელემენტები, ეს არის ცოცხალი, დინამიკური სისტემების შექმნა, რომლებიც ვითარდება კულტურასა და ტექნოლოგიასთან ერთად.
ქვემოთ რამდენიმე რჩევას გაგიზიარებთ, როგორ გავიკვლიოთ გზა თანამედროვე რებრენდინგში.
- გამოიყენეთ შრიფტი ხასიათით
სააგენტოები დიზაინერებს უფრო ღრმად ფიქრისკენ მოუწოდებენ. როგორც ისინი ამბობენ, საუკეთესო შრიფტები ისაა, რომლებსაც კონკურენტი კომპანია ვერასოდეს გამოიყენებდა.
მაგალითად, Burger King-ის 2021 წლის რებრენდინგში JKR რეტროშრიფტის არჩევით არ დაკმაყოფილდა. Colophon Foundry-სთან ერთად შეიქმნა უნიკალური შრიფტული ოჯახი Flame, მომრგვალებული ფორმებით, შთაგონებული თავად ბრენდის საკვებით. Walmart-ის შრიფტი კი სათავეს იღებს დამფუძნებლის, სემ უოლტონის 1980-იანი წლების სატვირთო მძღოლის ქუდიდან და დღეს უკვე გადაკეთებულია თანამედროვე, მრავალარხიანი კომუნიკაციისთვის.
გზავნილი ნათელია: ტიპოგრაფიის ემოციური დიაპაზონი ფართოვდება. ხელოვნური ინტელექტი ეხმარება შრიფტების მორგებას კამპანიის ტონსა და აუდიტორიაზე, თუმცა შრიფტმა უნდა იცოცხლოს მოძრაობაში და არა მხოლოდ ბრენდბუქში, რომელსაც იშვიათად კითხულობენ.
- ფერს უნდა ჰქონდეს მნიშვნელობა
Millennial Pink-ს თავისი ეპოქა ჰქონდა, მას Gen Z Purple მოჰყვა, თუმცა რეალური ფერთა სტრატეგია ბევრად სცდება ტენდენციების დევნას. საქმე ეხება ბრენდს, პროდუქტსა და ადამიანებს შორის ნამდვილ თანხვედრას, ასევე გამბედაობას, განსხვავებული გადაწყვეტილებების მისაღებად.
კონტექსტს დიდი მნიშვნელობა აქვს. ის, რაც ხუთი წლის წინ სანდოობას ან მდგრადობას გამოხატავდა, დღეს შესაძლოა მოძველებულად აღიქმებოდეს. კულტურული ცვლილებები ახალ ვიზუალურ პასუხებს მოითხოვს.
- ხმას მეტი პატივისცემა სჭირდება
Netflix-ის „Tu-Dum“-იდან Apple-ის ჩართვის ხმამდე, ხმოვან ბრენდინგს სულ უფრო სერიოზულად ეკიდებიან, თუმცა ბევრი ბრენდი მას მაინც მეორეხარისხოვნად აღიქვამს.
არადა, კვლევების მიხედვით, მუსიკა ადამიანებზე ღრმა, ინსტინქტურ დონეზე მოქმედებს და ბრენდებს სრულიად ახალი გზით აძლევს მათთან დაკავშირების შესაძლებლობას.
პოპულარული ტრეკების ლიცენზირება საკმარისი აღარ არის. მნიშვნელოვანია იმის გააზრება, თუ როგორ „ჟღერს“ თავად ბრენდი. ამის წარმატებული მაგალითებია Maison Mercury Jones-ის მიერ ARK/8-ისთვის შექმნილი სრულფასოვანი ხმოვანი სამყარო და Sonic Minds-ის მიერ კოპენჰაგენის მეტროსთვის შემუშავებული მოდულური აუდიოგარემო, მინიმალისტური, მაგრამ ადამიანური.
- მოქნილობა აღარ არის არჩევითი
ახალი ტექნოლოგიებისა და ქცევითი მოდელების მუდმივი ცვლილების პირობებში, ბრენდის ელემენტების ადაპტირებადობა აუცილებლობად იქცა. მთავარი გამოწვევა არის იმის განსაზღვრა, რა უნდა დარჩეს უცვლელი და რა – მოქნილი.
- მოძრაობა თავიდანვე უნდა იყოს ჩართული
ანგარიშის ერთ-ერთი ყველაზე მკაფიო გზავნილია ის, რომ მოძრაობა არ უნდა აღიქმებოდეს დეკორაციად. მოძრაობის ელემენტი ხშირად ბოლოს ემატება ბრენდინგსისტემას, რაც შეცდომაა. ის უნდა იყოს ისეთივე ფუნდამენტური, როგორც ფერი ან შრიფტი.
ეს მიდგომა გულისხმობს სახელმძღვანელოების, როგორც ქცევითი ჩარჩოების აღქმას და არა სტატიკურ დოკუმენტებს.
- მოსმენა და კულტურა
კარგი ბრენდები სწრაფად რეაგირებენ ტენდენციებზე, ხოლო ძლიერი ბრენდები თავად ქმნიან მათ. კულტურული აქტუალობა შემთხვევით არ ჩნდება, ის მიიღწევა აუდიტორიის მოსმენითა და რეალური კავშირების ჩამოყალიბებით.
მასშტაბს მნიშვნელობა არ აქვს, ნებისმიერ ბრენდს შეუძლია რეალური საზოგადოების შექმნა. მთავარია ცოდნა, ეს როგორ გააკეთო.
მთავარი დასკვნა ასეთია: თანამედროვე ბრენდის სისტემები უნდა იყოს შინაარსიანი, ხელმისაწვდომი, მოქნილი და მიზანმიმართული. დღეს ბრენდინგი მხოლოდ ლამაზ ვიზუალს არ ნიშნავს, კრეატიული პროფესიონალებისთვის ეს ნიშნავს პროცესის თავიდან გააზრებას – მოძრაობის ჩართვას დასაწყისიდანვე, მოქნილობის გათვალისწინებას სისტემის შექმნისას, ხმის მნიშვნელობის აღიარებას, ფერისა და ტიპოგრაფიის ემოციური პოტენციალის სრულად გამოყენებას, რადგან ბრენდინგი – ეს არის ცოცხალი სისტემების აგება, რომლებიც სუნთქავს, იცვლება და გრძელვადიან პერსპექტივაში არსებობს.
