საქართველოში კერძო განათლების სექტორი თითქმის მილიარდლარიან ბაზრად ჩამოყალიბდა. 2023 წელს კერძო საგანმანათლებლო დაწესებულებების შემოსავალი წლიურად 25.5%-ით გაიზარდა და 958.2 მილიონ ლარს მიაღწია.
Galt & Taggart-ის კვლევის მიხედვით, სექტორის ზრდა რამდენიმე ძირითადმა ფაქტორმა განაპირობა. მათ შორისაა უცხოელი სტუდენტების რაოდენობის მატება, კერძო სკოლებში მოსწავლეთა ზრდა და სწავლის საფასურის გაძვირება.
შემოსავლების ზრდაში მნიშვნელოვანი წვლილი კერძო უნივერსიტეტებმა შეიტანეს, სადაც უცხოელ სტუდენტებზე მოთხოვნა კვლავ მაღალია. ამასთან, კერძო სკოლების მიმართ ინტერესიც იზრდება, განსაკუთრებით თბილისში, სადაც ოჯახების ნაწილი ალტერნატიულ საგანმანათლებლო მომსახურებაზე უფრო მეტ თანხას ხარჯავს.
სექტორის გაფართოება გავლენას ახდენს არა მხოლოდ საგანმანათლებლო დაწესებულებებზე, არამედ უძრავი ქონების, დასაქმების, ტექნოლოგიების, ტრანსპორტისა და სხვა მომსახურებების ბაზარზეც.
მაღალი ზრდის მიუხედავად, კერძო განათლების სექტორისთვის მნიშვნელოვან გამოწვევად რჩება სახელფასო და საოპერაციო ხარჯების ზრდა, კვალიფიციური კადრების დეფიციტი და ხარისხიანი ინფრასტრუქტურის განვითარებისთვის საჭირო ინვესტიციები.
არსებული ტენდენცია აჩვენებს, რომ განათლება საქართველოში თანდათან უფრო მნიშვნელოვან ბიზნესსექტორად ყალიბდება, რომლის შემოსავლები მომავალ წლებში შესაძლოა მილიარდ ლარსაც გადააჭარბოს.
