თბილისის მთავრობის 100%-იანი წილობრივი მონაწილეობით დაფუძნებული შპს „ჰერმესი“ ექსკლუზიურად ახორციელებს ქალაქში არსებული სასაფლაოების მართვას და ამასთან მოქალაქეებს სთავაზობს სარიტუალო მომსახურებას.
2022 წლის ფინანსური ანგარიშგების მიხედვით, კომპანია 635 000 ლარამდე ზარალზეა. როგორც კომპანიაში აცხადებენ, ზარალი გამოწვეულია იმით, რომ 2022 წლის განმავლობაში კომპანიის საერთო შემოსავალმა ნაცვლად გეგმური 5 806 900 ლარისა შეადგინა 4 371 759 ლარი, რაც 1 435 140 ლარით ნაკლებია დაგეგმილ მაჩვენებელზე.
„აღნიშნული გარღვევა ძირითადად გამოწვეულია:
დაკრძალვებიდან მისაღები შემოსავალი გასულ წელთან შედარებით შემცირებულია და ნაცვლად გეგმით გათვალისწინებული 2.6 მლნ ლარისა შეადგინა 2.17 მლნ ლარი.
ზონირებულ ადგილებში სამარხის გამოყოფის, მე-3 და შემდგომი ადგილების დამატებიდან მისაღები შემოსავალი ნაცვლად 1.7 მლნ ლარისა ფაქტიურმა შემოსავალმა შეადგინა 1.25 მლნ ლარი.
წინასწარ ჩასხმული ციკოლების რეალიზაციიდან მიღებულმა შემოსავალმა ნაცვლად 6 ათასი ლარისა შეადგინა 131186 ლარი“, - ნათქვამია ანგარიშში.
გასული წლის მონაცემებით, „ჰერმესის“ მიმდინარე აქტივები 1.7 მლნ ლარს, ხოლო გრძელვადიანი აქტივები 3.6 მლნ ლარს შეადგენს. კომპანიის ვალდებულებები და საკუთარი კაპიტალი კი 5.6 მლნ ლარია.
2022 წელს კომპანიის საოპერაციო ხარჯები 5 მლნ ლარი იყო, საიდანაც 4.8 მლნ ადმინისტრაციულ ხარჯებს წარმოადგენდა. კომპანიას გასულ წელს მერიისთვის დივიდენდი არ გადაუხდია.
შპს „ჰერმესი“ 1997 წლის 19 აგვისტოს შეიქმნა. კომპანიის დირექტორი ნოდარ რაზმაძეა, 100%-იანი წილის მფლობელი კი თბილისის მერია.
