უკრაინაში შეჭრის გამო ევროკავშირმა რუსეთს სანქციების 10 პაკეტი დაუწესა. მე-11 პაკეტი, რომელიც ახლა თანხმდება, შეეხება მესამე ქვეყნებსაც, თუ არ შეწყვეტენ რუსეთის დახმარებას ბრიუსელის მიერ დაწესებული სავაჭრო ემბარგოს გვერდის ავლაში. იქნება თუ არა საქართველო ახალი პაკეტის სამიზნე ქვეყნებს შორის?
უახლოეს კვირებში თბილისში ვიზიტი აქვს დაგეგმილი სანქციების საკითხებში ევროკავშირის სპეციალურ წარმომადგენელს დევიდ ო'სალივანს. ამ თანამდებობის დაკავებამდე, იგი ევროკომისიის გენერალური მდივანი და ევროკავშირის ელჩი იყო შეერთებულ შტატებში.
რადიო თავისუფლებისთვის გამოგზავნილ პასუხში, ო’სალივანის წარმომადგენელი წერს, რომ სანქციების საკითხებში ევროკავშირის სპეციალური წარმომადგენელი, საქართველოს გარდა, ამჟამად არაერთ მესამე ქვეყანას სტუმრობს, რათა განიხილოს ევროკავშირის მუშაობა სანქციების აღსრულებასა და სანქციებისთვის გვერდის ავლის საწინააღმდეგო ზომებზე. Politico-ს ცნობით, ო'სალივანი გასულ კვირებში სტუმრობდა თურქეთს, უზბეკეთსა და ყაზახეთს; ასევე იყო სერბეთშიც, სადაც 11 მაისს პრეზიდენტ ალექსანდრ ვუჩიჩს შეხვდა.
სანქციების მე-11 პაკეტის შესახებ 9 მაისს, ევროპის დღის აღსანიშნავად კიევში ჩასულმა ევროკომისიის პრეზიდენტმა ურზულა ფონ დერ ლაიენმა გამოაცხადა.
„თუ ჩვენ დავინახავთ, რომ ევროკავშირიდან საქონელი მესამე ქვეყნების გავლით ხვდება რუსეთში, შეგვიძლია შევთავაზოთ წევრ ქვეყნებს ამ საქონელზე სანქციების დაწესება“, - განმარტა ფონ დერ ლაიენმა უკრაინის პრეზიდენტ ვოლოდიმირ ზელენსკისთან ერთად გამართულ პრესკონფერენციაზე.
სანქციების მე-11 პაკეტი - რა ჩაწერეს?
ახალი პაკეტი მესამე ქვეყნებსა და მათი მეშვეობით ევროკავშირის სანქციების გვერდის ავლაზეა ფოკუსირებული. დოკუმენტში, რომელსაც რადიო თავისუფლება გაეცნო, წერია, რომ ისეთი საქმიანობები, რომლის მიზანი ან შედეგია სანქციებისთვის გვერდის ავლა, ძირს უთხრის ევროკავშირის მიერ დაწესებული ამკრძალავი ზომების მიზანსა და ეფექტიანობას.
მასალა ვრცლად იხილეთ : radiotavisupleba.ge
