საქართველოში საწვავის ფასი ზრდას განაგრძობს. 15 სექტემბრის მდგომარეობით, ბრენდირებულ ავტოგასამართ სადგურებზე რეგულარის ტიპის ბენზინის ფასი 3.80 ლარს აჭარბებს, პრემიუმი 4 ლარზე მეტია, სუპერის ღირებულებამ კი 4.40 ლარს გადააჭარბა. დიზელის ფასი რიგ სადგურებზე 4.60 ლარს, ზოგ შემთხვევაში კი 4.75 ლარსაც აღემატება.
ნავთობპროდუქტების იმპორტიორთა კავშირის მონაცემებით, გასული წლის ანალოგიურ პერიოდთან შედარებით, საცალო ქსელში ბენზინი 25-30%-ით, დიზელი კი 49-56%-ით არის გაძვირებული.
ფასების ზრდის ერთ-ერთ მთავარ ფაქტორად საერთაშორისო ბაზარზე ნავთობის გაძვირება სახელდება. ბოლო ერთი წლის განმავლობაში WTI-ის ფასი დაახლოებით 66%-ით, Brent-ის კი 60%-ით გაიზარდა. ფასებზე გავლენას ახდენს ასევე რეგიონში არსებული სამხედრო და ლოგისტიკური რისკები, მათ შორის ჰორმუზისა და ბაბ-ელ-მანდების სრუტეებთან დაკავშირებული ვითარება.
ნავთობპროდუქტების იმპორტიორთა კავშირის პრეზიდენტი ვახტანგ იობაშვილი ამბობს, რომ საქართველოში საწვავის ფასის შემდგომი ცვლილება დიდწილად საერთაშორისო ბაზარზე განვითარებულ მოვლენებზე იქნება დამოკიდებული და ფასების დამატებით ზრდასაც არ გამორიცხავს.
ადგილობრივ ბაზარზე ფასის ფორმირებაზე, ნედლი ნავთობის გარდა, გავლენას ახდენს პლატსის ფასი, ტრანსპორტირებისა და დაზღვევის ხარჯები, გადასახადები, ვალუტის კურსი და კომპანიების საოპერაციო ხარჯები.
ამასთან, ბოლო ერთი წლის განმავლობაში ლარი დოლართან მიმართებით გამყარდა, თუმცა ეს ფაქტორი საწვავის საერთაშორისო გაძვირებით გამოწვეულ ზრდას ვერ ანეიტრალებს. საგადასახადო ტვირთი ამ პერიოდში არ შეცვლილა.
საწვავის გაძვირებას შესაძლოა სხვა პროდუქტებსა და მომსახურებებზეც ჰქონდეს გავლენა, რადგან ტრანსპორტირების, მშენებლობისა და სოფლის მეურნეობის ხარჯებში საწვავი მნიშვნელოვანი კომპონენტია. განსაკუთრებით მნიშვნელოვანია დიზელის ფასი, რომელსაც სატვირთო ავტომობილები და მძიმე ტექნიკის მნიშვნელოვანი ნაწილი იყენებს.
იანვარ-აგვისტოში საქართველოში სამომხმარებლო ფასების ზრდამ 5.3% შეადგინა, მაშინ როდესაც ეროვნული ბანკის სამიზნე ინფლაციის მაჩვენებელი 3%-ია.
ამ ეტაპზე საწვავის ფასის კლების კონკრეტული წინაპირობები არ იკვეთება. საბოლოო დინამიკა, მათ შორის, საერთაშორისო ნავთობის ბაზარზე, რეგიონში უსაფრთხოების ვითარებასა და ენერგორესურსების მიწოდების პირობებზე იქნება დამოკიდებული.
