ამერიკის შეერთებული შტატების პრეზიდენტი დონალდ ტრამპი სამხრეთ ირანში მდებარე სამხედრო ობიექტებზე განხორციელებულ ავიადარტყმებს ადასტურებს და აცხადებს, რომ ვაშინგტონი სამხედრო ოპერაციის განახლების შესაძლებლობას არ გამორიცხავს.
ტრამპის თქმით, ამერიკულმა საბრძოლო ავიაციამ იერიში მიიტანა ირანის რაკეტებისა და უპილოტო საფრენი აპარატების შესანახ ობიექტებზე, ასევე სანაპირო რადარების განლაგების ადგილებზე. აშშ-ის პრეზიდენტის განცხადებით, დარტყმების მიზეზი ცეცხლის შეწყვეტის შეთანხმების მორიგი დარღვევა გახდა.
„ამერიკის შეერთებული შტატების საბრძოლო ავიაციამ ახლახან დაარტყა ირანის რაკეტებისა და უპილოტო საფრენი აპარატების შესანახ ობიექტებს, ასევე სანაპირო რადარების განლაგების ადგილებს, ცეცხლის შეწყვეტის შეთანხმების მორიგი დარღვევის გამო. სავსებით შესაძლებელია, რომ ისინი ჭკუას ვერც ვერასოდეს ისწავლიან“, — განაცხადა დონალდ ტრამპმა.
აშშ-ის პრეზიდენტი არ გამორიცხავს, რომ ვითარების ესკალაციის შემთხვევაში ვაშინგტონმა ირანის წინააღმდეგ სამხედრო მოქმედებები განაახლოს. მისი თქმით, შესაძლოა დადგეს მომენტი, როდესაც შეერთებულ შტატებს „გონივრული მიდგომის შესაძლებლობა“ აღარ ექნება.
„შეიძლება დადგეს მომენტი, როდესაც ჩვენ აღარ გვექნება გონივრული მიდგომის შესაძლებლობა და იძულებულნი გავხდებით, სამხედრო გზით დავასრულოთ ის საქმე, რომელიც ძალიან წარმატებით დავიწყეთ. თუ ეს მოხდება, ირანის ისლამური რესპუბლიკა აღარ იარსებებს“, — აღნიშნა ტრამპმა.
ამ ეტაპზე უცნობია, მოჰყვა თუ არა ავიადარტყმებს მსხვერპლი ან რა მასშტაბის დაზიანება მიადგა სამიზნე ობიექტებს. ირანის ხელისუფლებას ტრამპის განცხადებაზე ოფიციალური კომენტარი ჯერ არ გაუკეთებია.
Associated Press
https://apnews.com/article/dca83ec0b72f498eea7146df5311b39c
ABC News
https://abcnews.com/International/live-updates/iran-live-updates?entryId=134256602&id=134086780
