არქიტექტურულმა ჯილდომ Prix Versailles–მა მსოფლიოში ყველაზე ლამაზი რკინიგზის სადგურები დაასახელა: მათი თითქმის ნახევარი ევროპაში მდებარეობს. ჯილდო, როგორც წესი, მუზეუმებს, სასტუმროებს, მაღაზიებსა და რესტორნებს გადაეცემათ, თუმცა წელს ორგანიზატორებმა განსაკუთრებული აქცენტი არქიტექტურის სხვა ტიპზე გააკეთეს.
7 ულამაზესი სადგურის სიაში შედის სამი ევროპული ლოკაცია: ლიონის პარ-დიეს სადგური საფრანგეთში, ასევე რომის კოლოსეო-ფორი იმპერიალის მეტროსადგური და ნეაპოლში მონტე სანტ-ანჯელო.
საფრანგეთის ლიონის პარ-დიეს სადგური გამარჯვებულებს შორის იყო ათწლიანი მასშტაბური რემონტის შემდეგ. არქიტექტურულმა ფირმებმა AREP-მა და L’AUC-მა ის ქალაქის მეზობელ უბნებს დამაკავშირებელ მთავარ სატრანსპორტო ცენტრად და საზოგადოებრივ სივრცედ აქციეს.
რემონტის დროს სადგურის ფართობი გაორმაგდა, აშენდა დამატებითი შესასვლელები და ჟორჟ პომპიდუს გამზირზე ლიანდაგების ქვეშ არსებული ყოფილი გადასასვლელი ფეხით მოსიარულეთა და ველოსიპედისტებისთვის გადაკეთდა. ის რაიონის აღმოსავლეთ და დასავლეთ ნაწილებს შორის დამაკავშირებელ რგოლად იქცა ფართო ტროტუარებითა და ველობილიკით.
რომის მეტროს C ხაზის სადგურმა „კოლოსეო - ფორი იმპერიალი“ ყურადღება Prix Versailles–ამდეც მიიპყრო. მშენებლობის დროს აღმოაჩინეს არქეოლოგიური აღმოჩენები, რომლებიც გადაწყდა, რომ ცალკე მუზეუმში არ გადაეტანათ და თავად სადგურის შიგნით, მინის მიღმა განეთავსებინათ. როდესაც მგზავრები პლატფორმებს უახლოვდებიან, არქეოლოგიური ექსპონატები იხსნება და სარდაფში წრიული ფანჯრიდან კოლიზეუმის ხედი იშლება. პრემიის ორგანიზატორები აღნიშნავენ, რომ ეს პროექტი აღარ შეიძლება ჩაითვალოს არც სადგურად მუზეუმში და არც მუზეუმად სადგურში: სივრცე ორივე ფუნქციას აერთიანებს.
ნეაპოლში მდებარე მონტე სანტ’ანჯელოს სადგურს, რომელიც ცნობილმა მხატვარმა ანიშ კაპურმა და არქიტექტურულმა ფირმებმა Future Systems-მა და AL_A-მ დააპროექტეს, არანაკლებ უჩვეულო იერსახე აქვს. მისი მიწისქვეშა სივრცეები ერთდროულად ვეზუვს, გამოქვაბულსა და კუმეელი სიბილას ლეგენდას მოგვაგონებს. დიზაინერებმა სადგური გიგანტურ ქანდაკებად ჩათვალეს, რომელშიც მგზავრებს შესვლა შეუძლიათ.
მსოფლიოში ულამაზესი ახალი სადგურების სიაში შედის:
Town Hall Station – მელბურნი, ავსტრალია
Lyon-Part-Dieu Station – ლიონი, საფრანგეთი
Colosseo – Fori Imperiali Station – რომი, იტალია
Monte Sant’Angelo Station – ნეაპოლი, იტალია
National Museum Station – ერ-რიადი, საუდის არაბეთი
Western Station – ერ-რიადი, საუდის არაბეთ
LAX/Metro Transit Center – ლოს-ანჯელესი, აშშ
