დონალდ ტრამპთან გაფორმებული სავაჭრო შეთანხმების ფარგლებში, იაპონია ამერიკის შეერთებული შტატების ნავთობის, ბუნებრივი აირისა და კრიტიკულად მნიშვნელოვანი მინერალების პროექტებში $36 მილიარდს დააბანდებს. შეთანხმების პირობებით, იაპონიამ აშშ-ის ეკონომიკაში $550 მილიარდამდე ინვესტირების ვალდებულება აიღო, აღნიშნული ინიციატივა კი ამ ვალდებულების პირველი ტრანში იქნება.
„იაპონიასთან ჩვენი მასშტაბური სავაჭრო შეთანხმება დაიწყო! პროექტების მასშტაბები ძალიან დიდია და მათი განხორციელება ერთი ძალიან განსაკუთრებული სიტყვის – ტარიფების – გარეშე წარმოუდგენელი იქნებოდა“, – დაწერა აშშ-ის პრეზიდენტმა დონალდ ტრამპმა სოციალურ მედიაში.
ინვესტირებასთან დაკავშირებით იაპონიის პრემიერ-მინისტრმა, სანაე ტაკაიჩიმ, განაცხადა, რომ პროექტები ეკონომიკური უსაფრთხოებისთვის მდგრადი მიწოდების ჯაჭვების შესაქმნელადაა გათვლილი ისეთ მნიშვნელოვან ინდუსტრიებში თანამშრომლობის წყალობით, როგორებიცაა კრიტიკულად მნიშვნელოვანი მინერალები, ენერგეტიკა და ხელოვნური ინტელექტი.
აშშ-სა და იაპონიის შეთანხმების ფარგლებში ყველაზე მნიშვნელოვანი ინვესტიცია ოჰაიოში მდებარე ბუნებრივი აირის ობიექტში განხორციელდება. აშშ-ის ვაჭრობის მდივან ჰოვარდ ლუტნიკის განცხადებით, ოჰაიოს მასშტაბური პროექტის წარმოება, რომელსაც ტრამპმა „ისტორიაში უდიდესი“ უწოდა, სავარაუდოდ 9.2 გიგავატ ენერგიას მიაღწევს.
ბუნებრივი აირის ელექტროსადგურში, რომელსაც SoftBank Group Corp.-ის შვილობილი კომპანია SB Energy უხელმძღვანელებს, იაპონია, სავარაუდოდ, $33 მილიარდამდე ინვესტიციას ჩადებს. სრული დატვირთვით მუშაობის შემთხვევაში, ელექტროსადგურის გამომუშავება ცხრა ბირთვული რეაქტორის ეკვივალენტი უნდა იყოს, დაახლოებით იმდენი, რაც 7.4 მილიონ სახლს ეყოფა.
ლუტნიკის ინფორმაციით, მეორე პროექტი მექსიკის ყურეში მდებარე ღრმაწყლოვანი ნედლი ნავთობის ექსპორტის ობიექტია. GulfLink-ის საექსპორტო ტერმინალში $2.1 მილიარდის ინვესტიცია განხორციელდება. მოსალოდნელია, რომ სრული დატვირთვით მუშაობის შემთხვევაში აშშ-ის ნედლი ნავთობის წლიური ექსპორტი $30 მილიარდს მიაღწევს.
სავარაუდოდ, იაპონია ინვესტიციას სინთეზური სამრეწველო ბრილიანტების წარმოების ობიექტშიც განახორციელებს. ლუტნიკის შეფასებით, მოწინავე სამრეწველო და ტექნოლოგიური წარმოებისთვის ბრილიანტები კრიტიკულად მნიშვნელოვანი შენატანი იქნება.
მოსალოდნელია, რომ პროექტების დაფინანსებაში წამყვან როლს სახელმწიფო საკუთრებაში არსებული იაპონიის საერთაშორისო თანამშრომლობის ბანკი (JBIC) და Nippon-ის ექსპორტისა და ინვესტიციების სადაზღვევო კორპორაცია (NEXI) ითამაშებენ. იაპონიის ვაჭრობის მინისტრის, რიოსეი აკაზავას განცხადებით, $550 მილიარდის ვალდებულებიდან ნაღდი ფულით ინვესტიციებზე თანხის 1-2% განაწილდება, უმეტესობა კი სესხებისა და გარანტიების საშუალებით დაიფარება.
