უკრაინაში რუსეთის შეჭრის შემდეგ, ევროკავშირის გაფართოების პოლიტიკამ ახალი პოლიტიკური იმპულსი შეიძინა. 4 ნოემბერს კანდიდატი ქვეყნები და წევრი სახელმწიფოები ბრიუსელში შეიკრიბებიან დებატებზე, რომელიც „ევრონიუსის“ ორგანიზებით იმართება.
ახალი გამოკითხვა აჩვენებს, რომ ევროპელების ნახევარზე მეტი მხარს უჭერს ევროკავშირის გაფართოების პროცესს, რომელიც ახალ პოლიტიკურ იმპულსს იძენს.
„ევრობარომეტრის“ კვლევის თანახმად, გაფართოებას ყველაზე მეტად უჭერს მხარს შვედეთი (79%), დანია (75%) და ლიეტუვა (74%). ამის საპირისპიროდ, ავსტრია (45%), ჩეხეთი (43%) და საფრანგეთი (43%) ყველაზე ნაკლებად მიმღებლობით გამოირჩევიან.
ევროკავშირის გაფართოების იდეა განსაკუთრებული მხარდაჭერით ახალგაზრდა ევროპელებში სარგებლობს. მას 15-24 წლის ახალგაზრდების 67% უჭერს მხარს, 25-39 წლის ასაკობრივ ჯგუფში კი ეს მაჩვენებელი 63%-ია. მთლიანობაში, გამოკითხვა აჩვენებს, რომ ევროპელების ორი მესამედი იწონებს ამ პროცესს. რესპონდენტთა 37% მიიჩნევს, რომ გაფართოება ევროკავშირის გლობალური გავლენის გაძლიერებას მოემსახურება. გარდა ამისა, რესპონდენტთა 37%-ს სჯერა, რომ ეს ევროპულ ბაზარს გააძლიერებს.
დაბოლოს, ევროკავშირის მოქალაქეების 30%-ის აზრით, რომ გაფართოება წევრ სახელმწიფოებს შორის მეტ სოლიდარობას გამოიწვევს. თუმცა, როგორც ცენტრის დირექტორის მოადგილე, კორინა სტრატულატი ამბობს, ამ პროცესის წინსვლა პოლიტიკურ ერთგულებას მოითხოვს.
„სასარგებლო იქნება, თუ პოლიტიკოსები საზოგადოებრივი მხარდაჭერის ამჟამინდელ ტალღას გამოიყენებენ, რათა უფრო ამბიციურები იყვნენ და მიიღონ ეფექტური ზომები ევროკავშირში ახალი წევრების მისაღებად. ამისთვის საჭიროა, განხორციელდეს აუცილებელი მოსამზადებელი სამუშაოები, რათა სხვა ქვეყნებსაც ჰქონდეთ გადაწყვეტილების მიღებაში მონაწილეობის საშუალება“, - განაცხადა მან.
ეს საკითხი 4 ნოემბერს „ევრონიუსის“ მიერ ორგანიზებული გაფართოების სამიტის ცენტრალური თემა იქნება. კანდიდატი ქვეყნების ლიდერებს საშუალება მიეცემათ, ამ პროცესის გამოწვევები ევროკავშირის წევრი სახელმწიფოების ოფიციალურ პირებთან განიხილონ. თუმცა, ევროკავშირის გაფართოების პერსპექტივამ შეშფოთებაც გამოიწვია. ამის მიზეზად, მოქალაქეების 40% უკონტროლო მიგრაციას ასახელებს, 39% ხაზს უსვამს კორუფციისა და დანაშაულის ზრდის რისკებს, ხოლო 37%-ს გადასახადის გადამხდელების ხარჯების შესაძლო გაზრდა აფიქრებს. იმისთვის, რომ ეს პოლიტიკური ნაბიჯი წარმატებული იყოს, ევროპის მოქალაქეები მიიჩნევენ, რომ გაფართოებას თან უნდა ახლდეს ზომები კანონის უზენაესობის გარანტიებისა და კორუფციასთან ბრძოლის (44%) კუთხით. გარდა ამისა, ისინი კანდიდატ ქვეყნებს მოუწოდებენ (38%), აიღონ მკაფიო ვალდებულებები ევროკავშირის რეფორმების განსახორციელებლად.
