Logitech-მა ახალი დასაკეცი მაუსი Mobi Fold წარადგინა, რომელიც განსაკუთრებით იმ ადამიანებისთვის შეიქმნა, ვისაც ხშირად უწევს გადაადგილება და სხვადასხვა ადგილიდან მუშაობა. მოწყობილობა დაკეცვისას თითქმის ბრტყელ ფორმას იღებს და ჯიბეშიც კი თავსდება, ხოლო გახსნისას სრულფასოვან, ერგონომიულ მაუსად გარდაიქმნება.
Mobi Fold-ის მთავარი უპირატესობა მისი კომპაქტური დიზაინია. Logitech-ის მონაცემებით, მიუხედავად იმისა, რომ პროფესიონალების უმეტესობას საკუთარი მაუსი აქვს, მათი მხოლოდ მცირე ნაწილი ატარებს მას ყოველდღიურად კაფეებში, აეროპორტებში ან სხვა სამუშაო სივრცეებში. სწორედ ამ პრობლემის გადასაჭრელად შეიქმნა ახალი მოდელი.
მაუსი სპეციალური მექანიზმით იკეცება და იშლება. გახსნისთანავე ავტომატურად ირთვება, ხოლო დაკეცვისას ითიშება. კონსტრუქციაში გამოყენებული სილიკონის დაფარული საკეცი მექანიზმი ათიათასობით გახსნა-დახურვის ციკლზეა გამოცდილი, რაც მის გამძლეობას უზრუნველყოფს.
Mobi Fold მხოლოდ 79 გრამს იწონის. დაკეცილი სახით ის მცირე ზომის ბლოკს ჰგავს, გახსნის შემდეგ კი ხელს ბუნებრივ მდგომარეობაში ამყოფებს და ტრეკპადის ხანგრძლივი გამოყენებით გამოწვეულ დისკომფორტს ამცირებს. მოწყობილობას ასევე აქვს ჩუმი დაწკაპუნების მექანიზმი და მტვრის მიმართ მდგრადი ზედაპირი, რაც საზოგადოებრივ სივრცეებში გამოყენებას უფრო კომფორტულს ხდის.
ფუნქციური შესაძლებლობებიც საკმაოდ მრავალფეროვანია. ტრადიციული ბორბლის ნაცვლად, მაუსი Adaptive Touch Scrolling ტექნოლოგიას იყენებს. Bluetooth-ის მხარდაჭერით კი Mobi Fold ერთდროულად სამ მოწყობილობას უკავშირდება. ის თავსებადია Windows, macOS, ChromeOS, Android, iPadOS და Linux სისტემებთან. კორპორაციული მომხმარებლებისთვის ხელმისაწვდომია Logi Bolt USB-C მიმღებიც, რომელიც უფრო დაცულ კავშირს უზრუნველყოფს.
ბატარეაც მოგზაურობაზე ორიენტირებული მომხმარებლებისთვისაა გათვლილი. სრული დამუხტვა 30 დღემდე მუშაობას უზრუნველყოფს, ხოლო USB-C-თ ერთწუთიანი დამუხტვა თითქმის მთელი დღის გამოყენებისთვის საკმარის ენერგიას იძლევა. მოწყობილობა ასევე Google Fast Pair-ს უჭერს მხარს, რაც Android და Chromebook მოწყობილობებთან სწრაფ დაკავშირებას ამარტივებს.
Mobi Fold ოთხ ფერში გამოვა: Graphite, Lilac, Off-White და Sand. მომხმარებლებისთვის მისი ფასი 79.99 დოლარია, ხოლო ბიზნესვერსიის ღირებულება 89.99 დოლარს შეადგენს.
