ევროპაში ცხოველთა კეთილდღეობის საკითხი სულ უფრო მეტად გადადის ეთიკური დისკუსიიდან სამართლებრივი რეგულაციების სფეროში. ბოლო წლებში ევროკავშირისა და მისი წევრი ქვეყნების მიერ მიღებული გადაწყვეტილებები აჩვენებს, რომ ხელისუფლებები მზად არიან შეზღუდონ ტრადიციები, ბიზნესპრაქტიკები და პოპულარული ჯიშების მოშენებაც კი, თუ ისინი ცხოველების ჯანმრთელობასა და კეთილდღეობას აზიანებს.
მნიშვნელოვანი ცვლილება ევროკავშირის დონეზე მოხდა, როდესაც ევროპარლამენტმა პირველად დაამტკიცა ერთიანი სტანდარტები ძაღლებისა და კატების კეთილდღეობის დასაცავად. ახალი წესები კრძალავს ისეთ პრაქტიკებს, როგორებიცაა ხმოვანი იოგების ოპერაციული მოცილება, ბრჭყალების ამოკვეთა და სხვა მტკივნეული პროცედურები, თუ მათ სამედიცინო აუცილებლობა არ გააჩნიათ. განსაკუთრებული ყურადღება ექცევა ასევე ცხოველების მიზანმიმართულ გამრავლებას ისეთი ფიზიკური მახასიათებლებით, რომლებიც ჯანმრთელობის პრობლემებს იწვევს.
ამ პოლიტიკის ერთ-ერთი ყველაზე თვალსაჩინო მაგალითი ნიდერლანდებია. ქვეყანაში უკვე აკრძალულია შოტლანდიური დაკეცილყურებიანი კატების (Scottish Fold) და სფინქსების ყიდვა, გაყიდვა, მოშენება და გარკვეულ შემთხვევებში ფლობაც კი. ვეტერინარების შეფასებით, დაკეცილი ყურები გენეტიკური მუტაციის შედეგია, რომელიც ძვლებისა და ხრტილების მძიმე დაავადებებს იწვევს, ხოლო უბეწვო კატები უფრო დაუცველები არიან კანის, ტემპერატურის რეგულაციისა და სხვა ჯანმრთელობის პრობლემების მიმართ.
ანალოგიური მიდგომა ვრცელდება ძაღლებზეც. ნიდერლანდებში ეტაპობრივად იზღუდება მოკლეცხვირიანი ჯიშების, მათ შორის მოპსებისა და გარკვეული ბულდოგების მოშენება, რადგან ასეთი ცხოველები ხშირად მთელი სიცოცხლის განმავლობაში სუნთქვის პრობლემებით, თვალის დაავადებებითა და გადახურების მაღალი რისკით იტანჯებიან. რეგულატორების შეფასებით, ეს შემთხვევაა, როდესაც გარეგნული სტანდარტები ცხოველის ჯანმრთელობაზე მაღლა დგას. (წყარო: Euro Pulse; ევროკავშირის ცხოველთა კეთილდღეობის ინიციატივები)
ცხოველების მიმართ დამოკიდებულების ცვლილება მხოლოდ გენეტიკურ საკითხებს არ ეხება. ბელგიის ფლანდრიის რეგიონში აიკრძალა ძაღლებისთვის ელექტრონული საყელურების გამოყენება, რომლებიც ელექტრო იმპულსების საშუალებით ცხოველის ქცევის კონტროლს ემსახურება. ცხოველთა უფლებების დამცველი ორგანიზაციების შეფასებით, ასეთი მოწყობილობები სტრესსა და ტკივილს იწვევს და თანამედროვე ვეტერინარული პრაქტიკა მათ გამოყენებას სულ უფრო ხშირად უარყოფს.
ცალკეა ფეიერვერკებთან დაკავშირებული რეგულაციებიც. მეცნიერები და ვეტერინარები წლებია მიუთითებენ, რომ ძლიერი ხმაური შინაურ და გარეულ ცხოველებში პანიკას, ტრავმას და ზოგჯერ სიკვდილსაც კი იწვევს. სწორედ ამიტომ ბელგიის ქალაქმა გენტმა ტრადიციულ საახალწლო ფეიერვერკებზე უარი თქვა, ხოლო სლოვაკეთის ქალაქმა პოპრადმა მსგავსი გადაწყვეტილება უკვე რამდენიმე წელია ზედიზედ მიიღო. ორივე მუნიციპალიტეტი მიიჩნევს, რომ დღესასწაულის აღნიშვნა ნაკლებად ხმაურიანი და უფრო უსაფრთხო ფორმებითაც არის შესაძლებელი.
მეორე მხრივ, ყველა ქვეყანა აკრძალვის გზას არ ირჩევს. ესპანეთის ქალაქ ლა-ნუსიაში ადგილობრივმა ხელისუფლებამ სპეციალური პროგრამა დაიწყო, რომლის ფარგლებშიც ძაღლებს ფეიერვერკების ხმასთან ადაპტირებას ასწავლიან. სპეციალისტები ეტაპობრივად აჩვევენ ცხოველებს ხმაურს, რათა სადღესასწაულო პერიოდებში მათი შფოთვა და სტრესი შემცირდეს.
ამ ცვლილებების მიღმა უფრო ფართო ტენდენცია იკვეთება. ევროპაში ცხოველებს სულ უფრო ხშირად განიხილავენ არა როგორც საკუთრებას, არამედ როგორც მგრძნობიარე არსებებს, რომელთა კეთილდღეობის დაცვა სახელმწიფოს პასუხისმგებლობაცაა. სწორედ ამიტომ რეგულაციები უკვე ვრცელდება არა მხოლოდ მოპყრობაზე, არამედ გამრავლების პრაქტიკებზე, საჯარო ღონისძიებებზე, ვეტერინარულ პროცედურებსა და შინაური ცხოველების ბაზარზეც. (წყარო: ევროპარლამენტი; ევროკავშირის ცხოველთა კეთილდღეობის რეგულაციები)
ბიზნესის თვალსაზრისით ეს ცვლილებები განსაკუთრებით მნიშვნელოვანია შინაური ცხოველების ინდუსტრიისთვის, რომელიც ევროპაში მილიარდობით ევროს მოცულობის ბაზარს წარმოადგენს. გამკაცრებული რეგულაციები გავლენას მოახდენს სელექციონერებზე, ვეტერინარულ კლინიკებზე, ცხოველების ონლაინ გაყიდვის პლატფორმებზე, აქსესუარებისა და მომსახურებების ბაზარზე. შედეგად, ცხოველთა კეთილდღეობა ევროპაში თანდათან იქცევა არა მხოლოდ ეთიკურ, არამედ ეკონომიკურ და მარეგულირებელ ფაქტორადაც, რომლის გათვალისწინება სექტორის ყველა მონაწილეს მოუწევს.
