იტალიაში სარკინიგზო ლიანდაგებს შორის მზის პანელების დამონტაჟებას გეგმავენ. ამგვარად, ლიანდაგებზე არსებული თავისუფალი სივრცე ელექტროენერგიის გამომუშავებას შეძლებს ისე, რომ მატარებლების მოძრაობას ხელი არ შეეშლება.
პროექტის საშუალებით სუფთა ენერგიის მიღება შესაძლებელი იქნება ცალკე მზის ელექტროსადგურების მშენებლობისა და სასოფლო-სამეურნეო მიწების გამოყენების გარეშე.
მზის პანელები ლიანდაგებს შორის, შპალებზე განთავსდება, მატარებლები კი მათ ზემოდან ჩვეულებრივად გაივლიან. თავდაპირველად გამომუშავებული ელექტროენერგიის საერთო ქსელში მიწოდება იგეგმება. მომავალში ენერგიის გამოყენება უშუალოდ რკინიგზაზეც სურთ, მათ შორის სადგურების გასანათებლად, შუქნიშნებისა და სხვა მოწყობილობების მუშაობისთვის.
პროექტის ავტორები ასევე სწავლობენ ელექტროენერგიის საკონტაქტო ქსელში მიწოდების შესაძლებლობას, რომლითაც ელექტრომატარებლები იკვებება. მათი შეფასებით, მზის პანელებით აღჭურვილ შედარებით მოკლე სარკინიგზო მონაკვეთსაც კი შეუძლია, წლის განმავლობაში რამდენიმე ოჯახის წლიური მოხმარების შესაბამისი ელექტროენერგია გამოიმუშაოს.
რადგან სარკინიგზო ლიანდაგებს რეგულარული შეკეთება სჭირდება, პანელები მოსახსნელი კონსტრუქციის სახით შეიქმნა. სამუშაოების დაწყებამდე სპეციალური მანქანა შეძლებს მთელი სისტემის აღებას ან მხოლოდ შესაკეთებელი მონაკვეთის გათავისუფლებას. სამუშაოების დასრულების შემდეგ კი პანელები ადგილზე ხელით დაშლის გარეშე დაბრუნდება.
თუმცა, რკინიგზა მზის ელექტროსადგურისთვის რთული გარემოა. პანელებმა მუდმივად უნდა გაუძლოს მატარებლების მოძრაობით გამოწვეულ ვიბრაციას, სიცხეს, ნალექს, მტვერსა და დამუხრუჭების დროს წარმოქმნილ ნაწილაკებს.
ამასთან, პანელებმა მემანქანეებისთვის სახიფათო ანარეკლი არ უნდა შექმნას და სარკინიგზო სასიგნალო სისტემების მუშაობას ხელი არ უნდა შეუშალოს.
ტექნოლოგიის ფართო მასშტაბით დანერგვამდე მისი უსაფრთხოება და ეფექტიანობა რეალურ საექსპლუატაციო პირობებში საპილოტე პროექტის ფარგლებში შემოწმდება.
