დიუშენის კუნთოვანი დისტროფიის მქონე ბავშვებისთვის უკვე მილიონი ლარი შეგროვდა - ამის შესახებ "დაიცავი ილიაუნი" იუწყება. სტუდენტები კვლავ მთელი ღამის განმავლობაში განაგრძობდნენ საქველმოქმედო ლაივ-მარათონს სოციალურ ქსელებში.
„ერთი მილიონი! თანხა, რომელიც შეუძლებლად ჟღერს. თანხა, რომელიც ქართველმა ხალხმა სიყვარულით, ერთობით და სოლიდარობით შეაგროვა" - წერენ "დაიცავი ილიაუნის" მარათონში ჩართული სტუდენტები ფეისბუკში. საორგანიზაციო ჯგუფის წევრები მუდმივად საქმის კურსში აყენებენ დიუშენის კუნთოვანი დისტროფიის მქონე ბავშვების მშობლებს, რომლებიც, უკვე თვეზე მეტია, მთავრობის ადმინისტრაციასთან, სკვერში, უწყვეტ აქციას მართავენ. სტუდენტების ინიციატივა მშობლებს ძალიან ახარებთ, რადგან მათ ბევრი, მათ შორის - ფინანსური პრობლემა აქვთ, რასაც ბავშვების მოვლის პროცესში აწყდებიან.
„თითოეული ლარი, რომელიც ჩაირიცხა, ეს იყო ქართველი ხალხის განცხადება, რომ ხელისუფლებამ ბავშვებს უნდა ჩამოუტანოს წამალი. ახლაც, ამ წუთასაც არ ჩერდება ჩარიცხვები, ზოგი 1 ლარს, ზოგი 35 თეთრს რიცხავს, ანუ ბოლო თეთრები რაც აქვთ, იმას რიცხავენ, რომ სწორედ ეს გზავნილი მიიტანონ ხელისუფლებამდე”, - უთხრა რადიო თავისუფლებას მარათონის ერთ-ერთმა ინიციატორმა, ლაშა ჯანჯღავამ.
მარათონში ჩართული სტუდენტები თანხის შეგროვებას ქუჩაშიც ცდილობენ - ადამიანებთან პირისპირ შეხვედრისა და ინფორმირების გზით - როგორც თბილისში, ასევე რეგიონებში. ბოლო დღეებში მათ არაერთი თანამოაზრე გამოუჩნდა, მათ შორის - ახალგაზრდები ცდილობენ გაყიდონ საკუთარი ნივთები და ფული ბავშვების დახმარების ფონდში გადარიცხონ.
დიუშენის კუნთოვანი დისტროფიის მქონე ბავშვების ოჯახები, უკვე წელიწად-ნახევარია, საჭირო მედიკამენტების საქართველოში შემოტანას უშედეგოდ ითხოვენ. მათ ვერც საქართველოს პრემიერ-მინისტრთან შეხვედრის მიზანს მიაღწიეს. სახელმწიფოს პასუხია, რომ საჭირო წამლებს ვერ შემოიტანენ, რადგან - ამ მედიკამენტებს არ ენდობიან.
„საუბარია საკმაოდ დიდ თანხაზე, დაახლოებით 50 მილიონზე, რომელიც ყოველწლიურად უნდა გაიხარჯოს. და აქ უნდა დაისვას მარტივი შეკითხვა... შეიძლება ამ თანხის დახარჯვამ მოიტანოს სათანადო შედეგი თუ ამ თანხით ჩვენ შეიძლება უბრალოდ გავამდიდროთ ფარმაცევტული მაფია?", - თქვა ირაკლი კობახიძემ 19 მაისს, პრესკონფერენციაზე. მანვე აღნიშნა, რომ როდესაც საუბარია ბიუჯეტიდან თანხის ხარჯვაზე, ხელისუფლებას აკისრია პასუხისმგებლობა „ხალხის ფულზე“:
სხვადასხვა მედიკამენტი, რომლებიც დიუშენის კუნთოვანი დისტროფიის მქონე ბავშვებს მდგომარეობას უმსუბუქებს, უკვე წარმატებით გამოიყენება აშშ-სა და ევროპის არაერთ ქვეყანაში. შედეგებს ადასტურებენ ემიგრაციაში მყოფი საქართველოს მოქალაქეები, რომლთა შვილებსაც ამ პრეპარატებზე მიუწვდებათ ხელი.
- დიუშენის კუნთოვანი დისტროფია ვერაგი ვერაგი გენეტიკური დაავადებაა. მკურნალობის გარეშე ნაადრევი ფატალური შედეგით სრულდება.
- დაავადების პირველი ნიშნები 2-5 წლის ასაკში იჩენს თავს, ადრეულ ასაკში იწვევს კუნთების დასუსტებას. ბავშვებს უვითარდებათ გულისა და ფილტვების პათოლოგიები.
- 10 წლის ასაკიდან ბავშვებისთვის სიარული შეუძლებელი ხდება და მშობლებს მათი ტარება ეტლით უწევთ.
