ჯანდაცვის მინისტრის მოადგილე მოუწოდებს B ჰეპატიტის მქონე პაციენტებსა და რისკის ქვეშ მყოფ მოქალაქეებს, წინასწარი კვლევები დროულად ჩაიტარონ, რათა, საჭიროების შემთხვევაში, სექტემბრიდან მედიკამენტის მიღება დაიწყონ, რომელიც ქვეყანაში სწორედ აღნიშნული თვიდან შემოვა.

შეგახსენებთ, რომ საქართველოში, B ჰეპატიტის მართვის სახელმწიფო პროგრამა მიმდინარე წლის 20 ივნისიდან დაიწყო - პაციენტები სერვისს სრულად უფასოდ მიიღებენ. პროგრამის მიზანი, საქართველოში, B ჰეპატიტით გამოწვეული ავადობის, სიკვდილიანობისა და ინფექციის გავრცელების შემცირებაა.

პროგრამის პირველ ეტაპზე, პაციენტები B ჰეპატიტზე ტესტირებასა და დიაგნოსტიკას გაივლიან. მკურნალობას კი სექტემბრიდან დაიწყებენ.

პროგრამის ფარგლებში, სახელმწიფოს მხრიდან, სრულად ანაზღაურდება პაციენტების სკრინინგი, მკურნალობაში ჩასართავად და მკურნალობის მონიტორინგისთვის საჭირო დიაგნოსტიკური კვლევები, ასევე - პაციენტებს უსასყიდლოდ გადაეცემათ B ჰეპატიტის სამკურნალო მედიკამენტები.

პროგრამის მოსარგებლეებად განისაზღვრებიან პირები  ქრონიკული HBV ინფექციით, აგრეთვე პირები, რომლებსაც დადგენილი  აქვთ  ქრონიკული B ჰეპატიტის დიაგნოზი და უკვე იმყოფებიან ანტივირუსულ მკურნალობაზე. პროგრამაში პაციენტების ჩართვა განხორციელდება კომისიური წესით.

B ჰეპატიტის მქონე იმ პირებისათვის, რომლებსაც კლინიკურად, ამ ეტაპზე, არ ესაჭიროებათ მკურნალობა, პროგრამით გათვალისწინებულია განმეორებითი დიაგნოსტიკური კვლევების ჩატარება ექიმის დანიშნულების შესაბამისად, 12 თვეში ერთხელ. იმ პირებს, რომლებსაც არ დაუდასტურდებათ B ჰეპატიტის ვირუსის არსებობა, დაავადების პრევენციის მიზნით, პროგრამის ფარგლებში, შესთავაზებენ B ჰეპატიტის საწინააღმდეგო ვაქცინაციას, რომელიც ასევე სრულად ანაზღაურდება სახელმწიფოს მხრიდან.

სერვისების მისაღებად, მოქალაქემ უნდა მიმართოს პროგრამის მიმწოდებელ დაწესებულებებს - პროგრამაში ჩართულია 15-მდე სამედიცინო დაწესებულება მთელი ქვეყნის მასშტაბით. სერვისის მიმწოდებლების რიცხვი ეტაპობრივად გაიზრდება.

გთავაზობთ იმ კლინიკების ჩამონათვალს, სადაც ტესტირება უკვე მიმდინარეობს:

იმერეთის მედიცინის განვითარების ცენტრი, ქუთაისი;

ფრანგული სამედიცინო ცენტრი „კახეთი-იონი“, გურჯაანი;

„ზუგდიდის ინფექციური საავადმყოფო“;

„ავერსის კლინიკა“, თბილისი;

„გიორგი აბრამიშვილის სახელობის საქართველოს თავდაცვის სამინისტროს სამხედრო ჰოსპიტალი“, გორი;

„თანამედროვე სამედიცინო ტექნოლოგიების დასავლეთის რეგიონალური ცენტრი“, ქუთაისი;

„ინფექციური პათოლოგიის შიდსისა და კლინიკური იმუნოლოგიის სამეცნიეროპრაქტიკული ცენტრი“, თბილისი; 

„სალიხ აბაშიძის ინფექციური პათოლოგიის,შიდსის და ტუბერკულოზის რეგიონული ცენტრი“, ბათუმი;

„ნეოლაბი“, თბილისი;

ჰეპატოლოგიური კლინიკა „ჰეპა“, თბილისი;

„რუსთავის მედიცინის სახლი-N1 სამკურნალო დიაგნოსტიკური ცენტრი“.

წყარო: jandacva.ge