საქართველო Transparency International-ის 2025 წლის კორუფციის აღქმის ინდექსში 182 ქვეყანასა და ტერიტორიას შორის 56-ე ადგილზეა. ქვეყანამ შესაძლო 100 ქულიდან 50 მიიღო. ინდექსში 100 ქულა საჯარო სექტორში კორუფციის აღქმის ყველაზე დაბალ, ხოლო 0 ქულა ყველაზე მაღალ დონეს ნიშნავს.
საქართველოს მაჩვენებელი წინა წელთან შედარებით 3 ქულით შემცირდა. 2024 წლის ინდექსში ქვეყანა 53 ქულით იყო შეფასებული. 2025 წელს საქართველოსთან ერთად 50 ქულა მიიღეს საბერძნეთმა, ბაჰრეინმა და იორდანიამაც.
ყველაზე მაღალი შედეგი კვლავ დანიას აქვს, 89 ქულით. მეორე ადგილზე ფინეთია 88 ქულით, ხოლო მესამე ადგილზე სინგაპური, რომელმაც 84 ქულა მიიღო.
რეიტინგის ბოლო ნაწილში ყველაზე დაბალი მაჩვენებლები აქვთ ქვეყნებს, სადაც სახელმწიფო ინსტიტუტები განსაკუთრებით სუსტია და ხანგრძლივი კონფლიქტები ან პოლიტიკური არასტაბილურობაა. სამხრეთ სუდანმა 9 ქულა მიიღო და 181-ე ადგილზე გავიდა.
Transparency International-ის შეფასებით, მსოფლიოში მდგომარეობა მთლიანობაში გაუარესდა. გლობალური საშუალო ქულა 42-მდე შემცირდა, ხოლო 182 ქვეყნიდან 122-მა 50-ზე ნაკლები ქულა მიიღო. ორგანიზაციის განცხადებით, ეს საჯარო სექტორში კორუფციის ფართოდ გავრცელებულ პრობლემაზე მიუთითებს.
აღმოსავლეთ ევროპისა და ცენტრალური აზიის რეგიონში საშუალო მაჩვენებელი მხოლოდ 34 ქულაა. Transparency International-ის შეფასებით, რეგიონში კორუფციის წინააღმდეგ პროგრესს სუსტი ინსტიტუტები, დემოკრატიული უკუსვლა და სამოქალაქო სივრცის შემცირება აფერხებს.
წყაროები:
https://www.transparency.org/en/cpi/2025
https://www.transparency.org/en/countries/georgia
https://www.transparency.org/en/news/cpi-2025-findings-insights-corruption
