იაპონიის უმსხვილესი ავტომწარმოებლები სხვადასხვა მოდელში საერთო კომპონენტების გამოყენების შესაძლებლობას განიხილავენ. ინიციატივის მიზანია წარმოების ხარჯების შემცირება და ჩინური, ევროპული და ამერიკული კომპანიების ფონზე იაპონური ავტოინდუსტრიის კონკურენტუნარიანობის შენარჩუნება.
ავტომობილების სხვადასხვა მოდელში ერთი პლატფორმის ან საერთო ნაწილების გამოყენება ახალი პრაქტიკა არ არის. ამ მიდგომის ერთ-ერთი ცნობილი მაგალითია Volkswagen Group-ის MQB პლატფორმა, რომელიც ჯგუფში შემავალმა რამდენიმე ბრენდმა მრავალი მოდელის შესაქმნელად გამოიყენა. საერთო კომპონენტები კომპანიებს კვლევის, წარმოებისა და მიწოდების ხარჯების შემცირებაში ეხმარება.
თუმცა ამ სტრატეგიას უარყოფითი მხარეც აქვს. როდესაც სხვადასხვა ავტომობილი ერთსა და იმავე ტექნოლოგიასა და კომპონენტებს იყენებს, არსებობს რისკი, რომ მოდელებმა ინდივიდუალურობა დაკარგონ და ერთმანეთს ზედმეტად დაემსგავსონ.
იაპონიაში განსახილველი ინიციატივა ერთი ავტოკონცერნის ბრენდებს კი არა, დამოუკიდებელ კომპანიებს შორის თანამშრომლობას გულისხმობს. პროცესში შესაძლოა ჩაერთონ იაპონიის ავტომწარმოებელთა ასოციაციის წევრები, მათ შორის Toyota, Honda, Nissan, Mazda, Subaru, Mitsubishi და Suzuki. ინიციატივას მხარს უჭერს Toyota-ს აღმასრულებელი დირექტორი და ასოციაციის თავმჯდომარე კოჯი სატო.
„ჩვენ ღრმა კრიზისს ვხედავთ და არსებობს განცდა, რომ იაპონიის ავტოინდუსტრია გარდამავალ პერიოდშია. ახლა სწორედ ის დროა, როდესაც რეფორმები, განვითარება და ცვლილებები ყველაზე მეტად გვჭირდება“, — განაცხადა სატომ.
Toyota-სა და Nissan-ის ხელმძღვანელების შეფასებით, ნაკლებად მნიშვნელოვანი კომპონენტების სტანდარტიზაცია კომპანიებს საშუალებას მისცემს, მეტი ფინანსური და ტექნიკური რესურსი მიმართონ პროგრამული სისტემების, მძღოლის დამხმარე ტექნოლოგიებისა და სწრაფად დამუხტვადი ელექტრომობილების განვითარებაზე.
ამ ეტაპზე საუბარია ძირითადად ისეთ ნაწილებზე, რომლებსაც მომხმარებელი პირდაპირ ვერ ხედავს, მაგალითად, ელექტროსადენებზე, გაყვანილობასა და მილებზე. ავტომობილების ძარის, დიზაინისა და ძირითადი პლატფორმების გაერთიანება ჯერჯერობით არ განიხილება. შესაბამისად, კომპანიები ცდილობენ ხარჯები შეამცირონ ისე, რომ ბრენდების განსხვავებული იდენტობა შეინარჩუნონ.
იაპონურ კომპანიებს თანამშრომლობის გამოცდილება უკვე აქვთ. Toyota-მ და BMW-მ ერთობლივად შექმნეს ახალი თაობის Supra და Z4, ხოლო Mazda MX-5-ის პლატფორმა Fiat 124 Spider-ის საფუძვლად გამოიყენეს. თუმცა ახალი ინიციატივა უფრო მასშტაბურია, რადგან მან შესაძლოა იაპონიის მთელი საავტომობილო ინდუსტრიის წარმოების სისტემა შეცვალოს.
