2026 წლის II კვარტალში საქართველოს ბიზნეს სექტორის ბრუნვის მოცულობამ 67.5 მილიარდი ლარი შეადგინა, რაც გასული წლის ანალოგიურ პერიოდთან შედარებით 11.9%-იანი ზრდაა. ამის შესახებ „საქსტატის“ საწარმოთა საქმიანობის შედეგების ანგარიშშია აღნიშნული.
ბრუნვის სტრუქტურაში ყველაზე დიდი წილი ხელოვნების, გართობისა და დასვენების სფეროზე მოდიოდა — 36.5%. მას მოსდევდა ვაჭრობის სექტორი, ავტომობილებისა და მოტოციკლების რემონტის ჩათვლით, 32.4%-ით.
შემდეგ პოზიციებზე იყვნენ:
- დამამუშავებელი მრეწველობა — 8.1%;
- ტრანსპორტი და დასაწყობება — 4.8%;
- მშენებლობა — 4.8%;
- ინფორმაცია და კომუნიკაცია — 3.4%;
- სხვა დარგები — 10%.
ამავე პერიოდში ბიზნეს სექტორში პროდუქციის გამოშვების მოცულობამ 25.7 მილიარდი ლარი შეადგინა, რაც წლიურად 10.7%-ით გაზრდილი მაჩვენებელია.
ბრუნვის მიხედვით, 69.8% მსხვილ ბიზნესებზე, 11.6% საშუალო, ხოლო 18.6% მცირე ბიზნესებზე მოდიოდა. პროდუქციის მთლიან გამოშვებაში კი მსხვილი ბიზნესის წილი 48.6% იყო, საშუალო ბიზნესის — 23.6%, მცირე ბიზნესის — 27.8%.
პროდუქციის გამოშვების სტრუქტურაში ლიდერობდა დამამუშავებელი მრეწველობა — 20.5%. შემდეგ მოდიოდა ვაჭრობა — 18%, მშენებლობა — 14.4%, ტრანსპორტი და დასაწყობება — 9.8%, ხოლო ინფორმაცია და კომუნიკაცია — 8.9%. დანარჩენი დარგების წილმა ჯამში 28.4% შეადგინა.
საქსტატის მონაცემებით, მეორე კვარტალში საწარმოებმა 32.5 მილიარდი ლარის საქონელი და მომსახურება შეიძინეს, რაც წლიურად 4.9%-იანი ზრდაა. აქედან 19.4 მილიარდი ლარის ღირებულების საქონელი და მომსახურება გადასაყიდად იყო განკუთვნილი — აღნიშნული მაჩვენებელი წლიურად 9.3%-ით გაიზარდა.
რეგიონულ ჭრილში ბიზნეს სექტორის ბრუნვისა და პროდუქციის გამოშვების მიხედვით თბილისი კვლავ ლიდერობდა. დედაქალაქზე მთლიანად ბრუნვის 79.4%, ხოლო პროდუქციის მთლიანი გამოშვების 63.6% მოდიოდა.
