დღის Top 10 საინტერესო ამბავი:

1. კახა კალაძის დაანონსებული სამშენებლო ამნისტია დროებით გადაიდო

 „კომერსანტმა“ გაარკვია, რომ საკომიტეტო განხილვები კანონპროექტზე, რომელსაც სამშენებლო სექტორი დიდი ხანი ელოდებოდა დაპაუზებულია. აღნიშნულ ინფორმაციას ადასტურებს კანონპროექტის ერთ-ერთი ავტორი, გარემოს დაცვისა და ბუნებრივი რესურსების კომიტეტის თავმჯდომარე მაია ბითაძე.

2. ვეძებთ იაფფასიან წამლებს, უხარისხო კათეტერებს და ერთჯერად სახარჯ მასალას - 520-ე დადგენილების შედეგები

2019 წლის ნოემბერში ჯანდაცვის მინისტრმა ეკატერინე ტიკარაძემ პირველი რეფორმა გაატარა. შედეგად საყოველთაო ჯანდაცვის პროგრამაში ჩართული კლინიკებისთვის ერთიანი ტარიფი ამოქმედდა. მთავრობის გადაწყვეტილება მაშინ ჯანდაცვის სფეროში მომუშავე ყველა პირმა, მედიკოსმა თუ ექსპერტმა გააკრიტიკა. „კომერსანტი“ დაინტერსდა 16 თვის შემდეგ რა შედეგები მოუტანა 520-ე დადგენილებამ კლინიკებს.

3. პოლიტიკიდან არ მივდივარ - გიორგი გახარია

ყოფილი პრემიერმინისტრი, გიორგი გახარია პოლიტიკიდან წასვლის შემდეგ მედიასთან პირველად გამოჩნდა. იგი აცხადებს, რომ არსად წასვლას არ აპირებს. ექსპრემიერი ამბობს, რომ გეგმებს და დღის წესრიგს მიჰყვება.

4. თიბისი ბანკი პოზიციებს თმობს - საქართველოს ბანკის მოგებამ 110 მლნ ლარს გადააჭარბა

ქართული ბანკების ჯამური აქტივები 2021 წლის იანვრის 56.4 მლრდ ლარამდე კლების შემდეგ, თებერვალში გაიზარდა. ეკონომიკური კრიზისის მიუხედავად გაიზარდა სექტორის ჯამური მოგებაც.

5. რედკომ წელს გუდაურში რედისონის გახსნა გადადო

„სასტუმროს ექსპლუატაციაში გაშვება და ხარჯის გაწევა, როდესაც ტურისტი არ არის ქვეყანაში, არაკომერციული გადაწყვეტლება იქნებოდა. რედისონის გახსნას გუდაურში წელსაც ვგეგმავდით, მაგრამ ახლა ტურისტულ ციკლზე ვართ დამოკიდებული,“ - ამის შესახებ „კომერსანტთან“ დეველოპერული კომპანია „რედკოს“ იურისტმა მალხაზ კუნელაურმა ისაუბრა.

6. „მეგი არ არის ვაქცინის მსხვერპლი, ის ჯანდაცვის სისტემის არაპროფესიონალიზმის და კორუფციის მსხვერპლია“ - გიორგი ფხაკაძე

გაეროს გენერალური მდივნის მრჩეველი, საზოგადოებრივი ჯანდაცვის ექსპერტი, პროფესორი გიორგი ფხაკაძე ვაქცინაციის ეროვნულ გეგმას აკრიტიკებს და მოითხოვს, იმ 82 ექსპერტის სია გამოქვეყნდეს, ვინც აღნიშნული გეგმის შექმნაში მონაწილეობდა.

7. ეკონომიკის სექტორები, რომლებიც 2020 წლის მეოთხე კვარტალში ყველაზე მეტად შემცირდა და გაიზარდა

2020 წლის IV კვარტალში მთლიანი შიდა პროდუქტის მოცულობა მიმდინარე ფასებში 13 907.0 მლნ. ლარს გაუტოლდა, ხოლო წინა წლის შესაბამის პერიოდთან შედარებით რეალური მთლიანი შიდა პროდუქტის კლებამ 6.8 პროცენტი შეადგინა.

8. თურქული ლირის გაუფასურების ფონზე ქართული ლარიც უფასურდება

დღეს Bloomberg-ის სავაჭრო სისტემაში ეროვნული ვალუტის გაუფასურება დაიწყო. ლარის კურსის მერყეობის გაზრდა, სავარაუდოდ, თურქული ლირის გაუფასურებას უკავშირდება, რამაც ბოლო 24 საათში 15% შეადგინა. თუმცა რამდენიმე საათის წინ საქართველოს ეროვნულმა ბანკმა სავალუტო აუქციონზე $40 მილიონი დოლარი გაყიდა. ოფიციალური გაცვლითი კურსის თანახმად, ამ ინტერვენციის ფონზე ლარი აშშ დოლართან მიმართებით 0.27 თეთრით გამყარდა და ერთი დოლარის ღირებულება 3.3299 ლარი გახდა.

9. Handelsblatt: მოსკოვი ვაშინგტონთან ურთიერთობების გადახედვას აპირებს

ჯო ბაიდენის განცხადებამ, რომ პუტინი მკვლელია, შესაძლოა დასავლეთის ურთიერთობებს რუსეთთან დიდი ზიანი მიაყენოს. მოსკოვი აღშფოთებულია, ევროკავშირი კი მის მიმართ პოზიციის შეცვლას არ გამორიცხავს. რუსეთის ხელისუფლებამ ბაიდენის გამონათქვამი აღმაშფოთებლად ჩათვალა და კრემლმა ამერიკასთან ურთიერთობების გადახედვის შესახებ განაცხადა.

10. ჩინეთის კომპარტიის ახალი მიზანი - მსოფლიო ლიდერობა

პეკინში ე.წ. „ორი სესიის“  - სახალხო წარმომადგენელთა კრების და პოლიტიკური საკონსულტაციო საბჭოს ყოველწლიური სხდომა დასრულდა. ამ ღონისძიებების დროს ჩინეთის კომპარტიამ ახალი სტრატეგიული გეგმა დაამტკიცა, რომელიც 2025 წლის ჩათვლით ქვეყნის მთავრობის მთავარ პრიორიტეტებს განსაზღვრავს.