კახა კალაძის დაანონსებული სამშენებლო ამნისტია გადაიდო. როგორც „კომერსანტმა“ გაარკვია, საკომიტეტო განხილვები კანონპროექტზე, რომელსაც სამშენებლო სექტორი დიდი ხანი ელოდებოდა დაპაუზებულია. აღნიშნულ ინფორმაციას ადასტურებს კანონპროექტის ერთ-ერთი ავტორი, გარემოს დაცვისა და ბუნებრივი რესურსების კომიტეტის თავმჯდომარე მაია ბითაძე. „ქართული ოცნების“ დეპუტატი „კომერსანტთან“ იმ ძირითად მიზეზებზე საუბრობს, რის გამოც კანონპროექტი „ამნისტიის შესახებ“ დროებით გადაიდო.

„ტექნიკური დეტალები ზუსტდება, რაც დროს მოითხოვს. საკომიტეტო მოსმენები გადაიდო უბრალოდ, რომ რეგლამენტი არ დაერღვიათ მაქსიმუმ ერთი თვით. ვფიქრობ, მომდევნო 10 დღეში შევაჯერებთ პოზიციებს პროექტის დამტკიცების შემდეგ, მისი აღსრულების მეტ ეფექტიანობასთან დაკავშირებით“, - განაცხადა მაია ბითაძემ.

„კომერსანტი“ დეტალურად გაგაცნობთ იმ დოკუმენტს, რომლსაც სამშენებლო სექტორისთვის მნიშვნელოვანი ცვლილებები უნდა მოეტანა. კანონპროექტის ავტორები მიიჩნევენ, რომ საკანონმდებლო ინიციატივის მიზანი არის ერთჯერადი დროებითი და განსაკუთრებული ღონისძიების სახით ჰუმანური მოქმედების განხორციელება. განმარტებით ბარათში ვკითხულობთ, რომ ამ გზით შესაძლებელი იქნება მიღწეულ იქნეს დასახული მიზანი და სრულყოფილი ნაბიჯები გადაიდგას კონკრეტული შენობა-ნაგებობების ექსპლუატაციაში მიღების თანმდევ პროცესებთან დაკავშირებით.

„კანონპროექტი, სისხლისსამართლებრივი პასუხისმგებლობისაგან და სასჯელისაგან ათავისუფლებს იმ პირებს, რომლებიც ბრალდებული ან მსჯავრდებული არიან საქართველოს სისხლის სამართლის კოდექსის 303-ე მუხლის პირველი ნაწილით.

კანონპროექტში ვკითხულობთ, რომ გამოძიება არ უნდა დაიწყოს, ხოლო დაწყებული გამოძიება უნდა შეწყდეს 303-ე მუხლით გათვალისწინებული დანაშაულის საქმეებზე, იმ შემთხვევაშიც კი, თუ არ არის დადგენილი დანაშაულის ჩამდენი პირი. ოფიციალურ დოკუმენტში წერია, რომ ამ კანონის საფუძველზე სასჯელისაგან გათავისუფლებულ პირებს ნასამართლობა მოეხსნებათ საქართველოს კანონმდებლობით დადგენილი წესით.

აღნიშნული კანონპროექტით გათვალისწინებულია იმ სამართალდამრღვევი სუბიექტების გათავისუფლება,, რომელთაც„საქართველოს სივრცის დაგეგმარების, არქიტექტურული და სამშენებლო საქმიანობის კოდექსის“ 131-ე და 132-ე მუხლებისა და „პროდუქტის უსაფრთხოებისა და თავისუფალი მიმოქცევის კოდექსის“ 44-ე და 45-ე მუხლების საფუძველზე დაეკისრათ პასუხისმგებლობა და კანონპროექტის შესაბამისი მუხლის ამოქმედების მომენტისათვის ჯარიმის/საურავის თანხა არ აქვს გადახდილი ან გადახდილი აქვს ნაწილობრივ, თავისუფლდებიან გადაუხდელი ნაწილის გადახდის ვალდებულებისაგან. გარდა ამისა, ჯარიმების გადახდისგან გათავისუფლება შეეხება შემთხვევებსაც როდესაც დაკისრებულია სამმაგი ოდენობის ჯარიმები.

კანონით გათვალისწინებული ამნისტია ვრცელდება მხოლოდ იმ პირებზე, რომლებმაც საქართველოს სისხლის სამართლის კოდექსის 303-ე მუხლით გათვალისწინებული დანაშაული ჩაიდინეს 2020 წლის 18 აგვისტომდე“ , - წერია დოკუმენტში.

კანონპროექტის ავტორები არიან  საქართველოს პარლამენტის წევრები: მაია ბითაძე, ბექა დავითულიანი, ნოდარ ტურძელაძე, ირაკლი ზარქუა, ბექა ლილუაშვილი, მიხეილ დაუშვილი, ანა ბუჩუკური.

ბაჩო ადამია