მსოფლიო ბანკის პროგნოზით, 2026 წელს გლობალური სასაქონლო პროდუქციის ფასები 23%-ით, ენერგომატარებლების კი 32%-ით გაიზრდება. ეს ენერგიის ფასების ყველაზე მაღალი წლიური მაჩვენებელი იქნება 2022 წლის შემდეგ. ამის შესახებ ნათქვამია მსოფლიო ბანკის ახალ ანგარიშში Commodity Markets Outlook.
ანგარიშის მიხედვით, ახლო აღმოსავლეთის კონფლიქტი ნავთობის მიწოდებას ზღუდავს, ხოლო შავ ზღვაში მარცვლეულის გადაზიდვების შეფერხება და ელ-ნინიოს გავლენა სურსათის ბაზარზე დამატებით რისკებს ქმნის.
მსოფლიო ბანკი ვარაუდობს, რომ ნავთობის Brent-ის მარკის საშუალო ფასი 2026 წელს ბარელზე 91 დოლარი იქნება, 2025 წლის 69 დოლართან შედარებით. 2027 წელს ფასი, სავარაუდოდ, 79 დოლარამდე შემცირდება. ამასთან, 2026 წელს სურსათის სასაქონლო ფასები დაახლოებით 10%-ით, ხოლო 2027 წელს დამატებით 7%-ით გაიზრდება.
ლითონების ფასები, მათ შორის ალუმინის, სპილენძისა და კალის, 2026 წელს ჯამურად 25%-ით მოიმატებს და რეკორდულ დონეს მიაღწევს. ძვირფასი ლითონების ფასების ზრდა კი 40%-ად არის პროგნოზირებული. მსოფლიო ბანკი აფრთხილებს, რომ ახლო აღმოსავლეთში კონფლიქტის გამწვავებამ და რუსეთის ნავთობის ინფრასტრუქტურის დაზიანების გაგრძელებამ შესაძლოა ფასები კიდევ უფრო გაზარდოს.
