OpenAI-ის აღმასრულებელი დირექტორის სემ ოლტმენის განცხადებით, კომპანია 2026 წელს საფონდო ბირჟაზე აქციების საჯაროდ განთავსებას არ გეგმავს. მან ეს გადაწყვეტილება ხელოვნურ ინტელექტთან დაკავშირებული უსაფრთხოების რისკებით ახსნა და აღნიშნა, რომ „მიუღებელია თუნდაც 10%-იანი ალბათობა იმისა, რომ ხელოვნურმა ინტელექტმა შესაძლოა ათწლეულის ბოლომდე კაცობრიობის გადაშენება გამოიწვიოს“.
სემ ოლტმენმა განცხადება იმ ფონზე გაავრცელა, როდესაც აშშ-ის კანონმდებლები ხელოვნური ინტელექტის სისტემების მარეგულირებელი ახალი წესებისა და კანონების შემოღებას ითხოვენ. ამის მიზეზი OpenAI-ის კონკურენტი კომპანიის, Anthropic-ის მკვლევრების მიერ გაკეთებული სერიოზული გაფრთხილებებია, რომელთა თანახმადაც, სწრაფად განვითარებადმა ხელოვნურმა ინტელექტმა შესაძლოა უახლოეს მომავალში კაცობრიობის გადაშენება გამოიწვიოს.
„ვფიქრობ, უსაფრთხოების კუთხით მიმდინარე პროცესების გათვალისწინებით, ახლა საფონდო ბირჟაზე გასვლა არაგონივრული ნაბიჯი იქნებოდა. ამ მხრივ ზეწოლას არ განვიცდით“, – განუცხადა სემ ოლტმენმა ბიზნესჟურნალ Fortune-ს.
კითხვაზე, არსებობს თუ არა ხელოვნური ინტელექტის მიერ გამოწვეული გადაშენების 10%-იანი ალბათობა, სემ ოლტმენმა უპასუხა, რომ არ იცის, როგორ შეიძლება მსგავსი შეფასების გაკეთება, თუმცა აღნიშნა, რომ რისკი საკმარისად სერიოზულია და ხელოვნური ინტელექტის სფეროში მომუშავე კომპანიებმა თუ მთავრობებმა ისე უნდა იმოქმედონ, თითქოს ეს რისკი სრულიად დასაშვებელია.
„მნიშვნელობა არა აქვს, 10%-ია ეს, 8 თუ 6 – მთავარია, რომ ყველას უდიდესი პასუხისმგებლობა გვაკისრია და არ უნდა დავუშვათ, რომ ამ გზაზე წინ აღგვიდგეს ეგო, მოგების წყურვილი ან რაიმე სხვა ფაქტორი“, – განმარტა ოლტმენმა.
ჯერ კიდევ ივნისში New York Times-მა გაავრცელა ინფორმაცია, რომ სან-ფრანცისკოში დაფუძნებული OpenAI IPO-ს მომავალ წლამდე გადადების შესაძლებლობას განიხილავდა, რომლის ღირებულებამაც შესაძლოა ტრილიონ დოლარს გადააჭარბოს.
Fortune-ის ცნობით, ალტმანმა ასევე მიანიშნა, რომ OpenAI და ხელოვნური ინტელექტის სფეროში მოღვაწე სხვა წამყვანი კომპანიები შესაძლოა ახლოს იყვნენ ისეთი შეთანხმების გასაჯაროებასთან, რომელიც ხელოვნური ინტელექტის განვითარების ტემპის შენელებასა და უსაფრთხოებასთან დაკავშირებული რისკების ერთობლივად მართვას ითვალისწინებს.
