Saudi Aramco ევროპელ მომხმარებლებს მომავალ თვეში ნედლი ნავთობის მიწოდებას შეუწყვეტს, მას შემდეგ, რაც საუდის არაბეთის აღმოსავლეთიდან წითელი ზღვის სანაპირომდე მიმავალი საკვანძო ნავთობსადენი თავდასხმის შედეგად დაზიანდა. პარალელურად, კომპანია ნავთობის ექსპორტის ალტერნატიული მარშრუტების გამოყენებას ზრდის.
გადაწყვეტილების შესახებ ინფორმირებულმა პირებმა განაცხადეს, რომ Saudi Aramco-მ ევროპაში სულ მცირე ორ ნავთობგადამამუშავებელ კომპანიას აცნობა ამ გადაწყვეტილების შესახებ.
Bloomberg-ის ინფორმაციით, Aramco-მ ევროპელ მომხმარებლებს, რომლებიც ნავთობს გრძელვადიანი კონტრაქტებით იღებენ, ოქტომბრისთვის ნედლი ნავთობის მოცულობები არ გამოუყო. წყაროების ცნობით, გადაწყვეტილება ევროპის ყველა მყიდველს ეხება.
ევროპელი მომხმარებლები საუდის არაბეთიდან ნავთობს, როგორც წესი, გრძელვადიანი კონტრაქტებით იღებენ, რომლებიც ყოველთვიურ მიწოდებას უზრუნველყოფს. თუმცა, ოქტომბერში ეს მიწოდებები აღარ განხორციელდება, განაცხადეს წყაროებმა.
გადაწყვეტილება უკავშირდება East-West Pipeline-ზე განხორციელებულ თავდასხმას, რომლის შედეგადაც სამი სატუმბი სადგური დაზიანდა და წითელი ზღვის პორტ იანბუში ნავთობის ჩატვირთვები შეფერხდა.
საუბარია დაახლოებით 1,200 კილომეტრის სიგრძის East-West Pipeline-ზე, რომლის მეშვეობითაც საუდის არაბეთის აღმოსავლეთ ნაწილში მოპოვებული ნავთობი წითელი ზღვის პორტებამდე მიეწოდება. Reuters-ის ცნობით, თავდასხმის შედეგად ნავთობსადენის სამი სატუმბი სადგური დაზიანდა, რის გამოც ექსპორტის შესაძლებლობებთან დაკავშირებით გაურკვევლობა გაიზარდა.
ამავდროულად, Aramco ნავთობის ექსპორტის ალტერნატიულ მარშრუტებს იყენებს. Reuters-ის ინფორმაციით, კომპანიამ სექტემბრისა და ოქტომბრის ჩატვირთვებისთვის დაახლოებით 60 მილიონი ბარელი ნავთობი გაყიდა, რომლის ნაწილი ომანის სოჰარის პორტის გავლით უნდა გაიგზავნოს.
