ნიდერლანდების სამხრეთით მდებარე ლიმბურგის პროვინცია ინტელექტუალური საზოგადოების ფორუმმა (Intelligent Community Forum, ICF) მსოფლიოში ყველაზე ჭკვიან რეგიონად დაასახელა. ეს არის საერთაშორისო ორგანიზაცია, რომელიც აერთიანებს დაახლოებით 200 ქალაქსა და ტერიტორიას და ეხმარება მათ ახალი ტექნოლოგიების გამოყენებაში ადამიანების ცხოვრების გასაუმჯობესებლად.
ჟიურიმ აღნიშნა, თუ როგორ მუშაობენ ერთად ადგილობრივი ხელისუფლება, მეცნიერები და მეწარმეები ყოფილ მეშახტეების რეგიონში ცხოვრების შესაცვლელად. ლიმბურგი წარმოადგენდა Brightlands–ის ქსელს, რომელიც აერთიანებს ოთხ სამეცნიერო და ტექნოლოგიურ კამპუსს.
მაასტრიხტი მედიცინაზეა ორიენტირებული, ჰერლენი - ხელოვნურ ინტელექტსა და მონაცემებზე, სიტარდ-გელენი - ახალ მასალებსა და უფრო მდგრად ქიმიურ ტექნოლოგიებზე, ხოლო ვენლო - საკვების მოყვანისა და წარმოების კვლევებზე. მაგალითად, ვენლოში მეცნიერები ქმნიან სათბურს, სადაც რობოტებსა და დრონებს შეუძლიათ მცენარეებზე ზრუნვა და მოსავლის აღება ადამიანის მინიმალური ჩარევის გარეშე. რობოტიკის ლაბორატორია 2026 წლის ივნისში გაიხსნა, ხოლო ახალი ექსპერიმენტული სათბურის მშენებლობა 2028 წლის ბოლოსთვის დასრულდება. აქ ბიოლოგები და ინჟინრები მცენარეთა ავტომატიზებული კულტივაციის შესამოწმებლად ითანამშრომლებენ.
ამავდროულად, ICF აფასებს არა მხოლოდ სამეცნიერო მიღწევებს, არამედ იმასაც, თუ როგორ ეხმარება ტექნოლოგიები ადამიანებს. ლიმბურგში მცხოვრებლებს შეუძლიათ უფასოდ მიიღონ კონსულტაცია პროფესიის შეცვლის შესახებ და შეარჩიონ სწავლება.
ბიბლიოთეკები მათ ელექტრონული სახელმწიფო სერვისების ათვისებაში ეხმარებიან, ხოლო მედიაწიგნიერების გაკვეთილებზე ასწავლიან როგორა ამოიცნონ არასარწმუნო ინფორმაცია ინტერნეტში.
ჟიურიმ განსაკუთრებით აღნიშნა რეგიონის პროგრესი ქვანახშირის მაღაროების დახურვის შემდეგ. ერთ დროს ადგილობრივი მუშაკების მესამედი სამთომოპოვებით მრეწველობაში მუშაობდა. თუმცა, ქვანახშირის მოპოვებაზე უარის თქმამ ბევრ მცხოვრებს ტრადიციული სამსახური წაართვა და რეგიონი იძულებული გახდა განვითარების ახალი მიმართულებები ეძებნა.
დღეს უნივერსიტეტები, კომპანიები, მთავრობები და საზოგადოებრივი ორგანიზაციები კამპუსების გარშემო თანამშრომლობენ.
ფინალში ლიმბურგმა ბრაზილიის, თურქეთის, აშშ-ის, კანადის, ესპანეთისა და ტაივანის ექვსი წარმომადგენელი დაამარცხა. მანამდე ნიდერლანდებში ეს ჯილდო 2011 წელს ეინდჰოვენის გარშემო ბრეინპორტის რეგიონმა მიიღო.
