პლანეტის მოსახლეობა ამჟამად 8.3 მილიარდს შეადგენს, თუმცა, Daily Mail-ის ცნობით, რომელიც ავსტრალიის ფლინდერსის უნივერსიტეტის კვლევას ეყრდნობა, 2070-იანი წლების ბოლოსთვის შესაძლოა მსოფლიოს მოსახლეობამ კრიტიკულ 12.4 მილიარდს მიაღწიოს.
პროფესორ კორი ბრედშოუს ხელმძღვანელობით მეცნიერთა ჯგუფმა 200 წელზე მეტი ხნის განმავლობაში გააანალიზა გლობალური მოსახლეობის მონაცემები და ეკოლოგიური ზრდის მოდელების გამოყენებით შეისწავლა, თუ როგორ მოქმედებს მოსახლეობის ზრდა საკვების უსაფრთხოებაზე, კლიმატის სტაბილურობასა და ადამიანის კეთილდღეობაზე. შედეგებმა გამოავლინა „მკაფიო ბიოლოგიური სიგნალი“, რომ კაცობრიობა უკვე პლანეტის შესაძლებლობების მიღმა ცხოვრობს.
„დედამიწას არ შეუძლია ჩვენი რესურსების გამოყენებასთან ერთად ტემპის შენარჩუნება. მნიშვნელოვანი ცვლილებების გარეშე მას დღევანდელი მოთხოვნის დაკმაყოფილებაც კი არ შეუძლია“, - აღნიშნა ბრედშოუმ.
1950-იან წლებამდე მოსახლეობის ზრდა ტექნოლოგიური და ეკონომიკური განვითარების დაჩქარებას იწვევდა. 1960-იანი წლების დასაწყისში ეს ურთიერთობა დაირღვა: მოსახლეობის ზრდა აღარ იწვევდა ეკონომიკური ზრდის დაჩქარებას, რამაც ე.წ. „უარყოფითი დემოგრაფიული ფაზის“ დასაწყისი გამოიწვია.
მკვლევართა გათვლებით, „მდგრადი“ მოსახლეობის ზომა, რომლის დროსაც კაცობრიობას შეუძლია არსებობა ეკოლოგიურ საზღვრებში და კომფორტული ცხოვრების დონის შენარჩუნება, დაახლოებით 2,5 მილიარდ ადამიანს შეადგენს. თუ მოსახლეობა 11,7–12,4 მილიარდს მიაღწევს, ეს დამანგრეველ შედეგებს გამოიწვევს: გლობალური ტემპერატურის მატებას, ეკოლოგიური კვალისა და ნახშირბადის გამონაბოლქვის ზრდას და პლანეტის სიცოცხლის შენარჩუნების სისტემებზე ზეწოლის ზრდას.
