BlackRock-ის მთავარმა აღმასრულებელმა დირექტორმა ლარი ფინკმა გააფრთხილა, რომ მონაცემთა ცენტრების მშენებლობის შეჩერებამ შესაძლოა ეკონომიკური შენელება გამოიწვიოს.
„თუ ამ ქვეყანაში რაიმე სახის მორატორიუმი დაწესდება, რეცესიის წინაშე აღმოვჩნდებით“, — განუცხადა ფინკმა CNBC-ს ოთხშაბათს, მას შემდეგ, რაც BlackRock-მა, დღის პირველ ნახევარში, მესამე კვარტალის მოსალოდნელზე უკეთესი ფინანსური შედეგები გამოაქვეყნა. დღის მეორე ნახევარში, ვაჭრობისას, BlackRock-ის აქციების ფასი დაახლოებით 1%-ით გაიზარდა.
„ჩვენი ეკონომიკის დიდი ნაწილი სწორედ ამ კაპიტალდაბანდებების გაზრდაზეა დამოკიდებული“, — დასძინა ფინკმა და გულისხმობდა იმ მასშტაბურ ინვესტიციებს, რომლებიც ხელოვნური ინტელექტის ინფრასტრუქტურის განვითარებისთვის ხორციელდება.
ფინკის გაფრთხილება იმ ფონზე გაჟღერდა, როდესაც მონაცემთა ცენტრების მშენებლობის წინააღმდეგ მიმართული ძლიერი ადგილობრივი წინააღმდეგობა 3 ნოემბრის შუალედური არჩევნების ერთ-ერთ მთავარ საკითხად იქცა; ადგილობრივი თემები კი ისეთ გამოწვევებს უმკლავდებიან, როგორიცაა კომუნალური გადასახადების ზრდა, წყლის მოხმარება, გარემოსთვის მიყენებული ზიანი და ინვესტიციების გამჭვირვალობასთან დაკავშირებული კითხვები.
მართალია, ფინკმა აღიარა, რომ მონაცემთა ცენტრების მშენებლობასთან დაკავშირებით შიშები არსებობს, თუმცა ასევე აღნიშნა, რომ „ეს შიშები, დიდწილად, დეზინფორმაციას ეფუძნება“.
სასწორზე ბევრია დადებული. უოლ-სტრიტის ანალიტიკოსების შეფასებით, ხელოვნურ ინტელექტთან დაკავშირებული კაპიტალური დანახარჯები 2027 წლისთვის შესაძლოა 1 ტრილიონ დოლარს გადასცდეს, 2030 წლისთვის კი ჯამში 5 ტრილიონ დოლარზე მეტს მიაღწიოს.
„მონაცემთა ცენტრები პრობლემას არ წარმოადგენს. ისინი უფრო მეტ ახალ სამუშაო ადგილს ქმნიან, ვიდრე ოდესმე“, - განმარტა BlackRock-ის აღმასრულებელმა დირექტორმა. მისი თქმით, ინვესტიციების მასშტაბმა ქსელური ელექტროენერგიის უზრუნველსაყოფად სამშენებლო მუშაკებზე, ფიზიკურ ციფრულ ინფრასტრუქტურაზე, ხელოვნური ინტელექტის გამოთვლით აპარატურასა და ენერგეტიკულ ინფრასტრუქტურაზე მოთხოვნა შექმნა.
