იაპონიამ, დღეს, 18 აპრილს, უკრაინასთან ხელი მოაწერა შეთანხმებას, რომლის მიხედვითაც უკრაინას 471.9 მილიარდი იაპონური იენის (3 მილიარდი აშშ დოლარი) ოდენობის სესხი გამოეყოფა, რომელიც გაყინული რუსული აქტივებიდან მიღებული თანხით დაიფარება.
თანხა "დიდი შვიდეულის" ქვეყნების (G7) უკრაინისთვის შემოსავლების აჩქარების (ERA) პროგრამის ფარგლებში შედის, რომლის მიზანიც კიევისთვის 50 მილიარდი დოლარის გამოყოფაა რეკონსტრუქციისა და თავდაცვის საჭიროებისთვის. სესხის დაფარვა G7-ის წევრების ანგარიშებზე განთავსებული დაახლოებით 300 მილიარდი დოლარის რუსული სუვერენული აქტივებიდან მიღებული თანხებით მოხდება.
"იაპონია საერთაშორისო სოლიდარობის ნათელი მაგალითია, რომელიც გახდა უკრაინის ერთ-ერთი წამყვანი პარტნიორი თავისუფლებისა და ღირსებისთვის ბრძოლაში.
დღევანდელი შეთანხმების ხელმოწერა არა მხოლოდ ხელს შეუწყობს ჩვენი გადაუდებელი საბიუჯეტო საჭიროებების დაკმაყოფილებას, არამედ კიდევ ერთი დადასტურება იქნება იაპონიის გულწრფელი ერთგულების მიმართ იმ საერთო ღირებულებების მიმართ, რომლებიც აერთიანებს ჩვენს ქვეყნებს," - განაცხადა უკრაინის ფინანსთა მინისტრმა სერგეი მარჩენკომ კიევში იაპონიის ელჩთან, მასაში ნაკაგომესთან, შეთანხმებაზე ხელმოწერის შემდეგ.
იაპონიის სესხი 30 წლის განმავლობაში გაიცემა და მიმართული იქნება საბიუჯეტო საჭიროებების დასაკმაყოფილებლად და რეკონსტრუქციისა და განვითარების მხარდასაჭერად.
