ჰორმუზის სრუტის ჩაკეტვის შედეგად ევროკავშირს იმავე მოცულობის წიაღისეული საწვავის შესაძენად დამატებით 127 მილიარდი ევროს დახარჯვა მოუწია. ამის შესახებ ევროკომისიის პრეზიდენტმა ურსულა ფონ დერ ლაიენმა ბრიუსელში, სტარტაპებისადმი მიძღვნილ WinWin Summit-ზე განაცხადა.
„ჰორმუზის სრუტის ჩაკეტვის შემდეგ იმპორტირებული წიაღისეული საწვავი ევროპას დამატებით 127 მილიარდი ევრო დაუჯდა, თუმცა სანაცვლოდ ენერგიის ერთი დამატებითი ერთეულიც არ მიუღია“, — აღნიშნა ფონ დერ ლაიენმა. მისი თქმით, ნავთობისა და გაზის იმპორტზე დამოკიდებულება ევროპას გლობალური კრიზისებისა და ფასების მკვეთრი ცვლილებების მიმართ მოწყვლადს ხდის.
ევროკომისიის პრეზიდენტის განცხადებით, შექმნილი ვითარება კიდევ ერთხელ აჩვენებს, რომ ენერგოდამოუკიდებლობა და სუფთა ენერგიაზე გადასვლა მხოლოდ კლიმატური პოლიტიკის საკითხი არ არის — ის ევროპის ეკონომიკურ კონკურენტუნარიანობასა და უსაფრთხოებასაც უკავშირდება.
ფონ დერ ლაიენმა კიდევ ერთხელ დაადასტურა ევროკავშირის მიზანი, 2050 წლისთვის კლიმატნეიტრალური კონტინენტი გახდეს. მისი თქმით, ევროკავშირს 2040 წლისთვის სათბურის აირების ემისიების 90%-ით შემცირების ვალდებულებაც აქვს აღებული. ევროკომისიის პრეზიდენტის განცხადებით, 2021 წლიდან ევროკავშირში მდგრად საქმიანობებში 1.2 ტრილიონ ევროზე მეტი ინვესტიცია განხორციელდა.
ჰორმუზის სრუტე სპარსეთის ყურეს ომანის ყურესა და არაბეთის ზღვასთან აკავშირებს და ნავთობისა და თხევადი ბუნებრივი აირის საერთაშორისო საზღვაო ვაჭრობისთვის ერთ-ერთი უმნიშვნელოვანესი მარშრუტია. მისი ჩაკეტვით გამოწვეულმა მიწოდების შეფერხებამ ენერგორესურსებზე ფასები გაზარდა და იმპორტიორი ქვეყნების ხარჯები მნიშვნელოვნად გააძვირა.
