ფიფას პრეზიდენტმა ჯანი ინფანტინომ განაცხადა, რომ ორგანიზაცია აღარ განახორციელებს გეგმას, რომელიც მსოფლიო ჩემპიონატებსა და ფიფას სხვა დიდ ტურნირებში კერძო ინვესტორების ჩართვას ითვალისწინებდა.
ინფანტინოს თქმით, პროექტის გარშემო წარმოქმნილმა დაპირისპირებამ ცხადყო, რომ მისი გაგრძელება ფეხბურთის საერთო ინტერესებს აღარ ემსახურებოდა.
„ყველა მოსაზრების ყურადღებით მოსმენის შემდეგ ნათელი გახდა, რომ პროექტმა სერიოზული უთანხმოება გამოიწვია. ამიტომ ეს წინადადება აღარ განხორციელდება“, — განაცხადა ფიფას პრეზიდენტმა.
გეგმის მიხედვით, ფიფას სურდა შეექმნა კომერციული შვილობილი კომპანია — FIFA Forward Enterprise, რომელიც ორგანიზაციის მთავარ ტურნირებთან დაკავშირებულ სატელევიზიო, სპონსორულ და სხვა კომერციულ უფლებებს მართავდა. გარე ინვესტორებს კომპანიის უმცირესობის წილის შეძენა შეეძლებოდათ, ხოლო ფიფა კონტროლს შეინარჩუნებდა.
გავრცელებული ცნობებით, ახალი სტრუქტურის ღირებულება დაახლოებით 20 მილიარდ დოლარად იყო შეფასებული. საინვესტიციო ჯგუფის ხელმძღვანელად ამერიკული კომპანია Thrive Capital განიხილებოდა, რომელიც ჯოშუა კუშნერმა — აშშ-ის პრეზიდენტ დონალდ ტრამპის სიძის, ჯარედ კუშნერის ძმამ — დააარსა.
ინფანტინო ფიფას 211 წევრ ასოციაციას პროექტის მხარდაჭერის სანაცვლოდ 40 მილიონ დოლარამდე დაფინანსებას ჰპირდებოდა. თავდაპირველად 20 მილიონი დოლარი უნდა გაცემულიყო, თუმცა ფედერაციებს გადაწყვეტილება 19 სექტემბრამდე უნდა მიეღოთ.
გეგმას მწვავე წინააღმდეგობა შეხვდა. უეფას 55-მა წევრმა ასოციაციამ განაცხადა, რომ პროექტის განხორციელების შემთხვევაში მსოფლიო ჩემპიონატების ბოიკოტსაც განიხილავდა. უარყოფითი პოზიცია გამოხატეს ჩრდილოეთ და ცენტრალური ამერიკისა და კარიბის ზღვის აუზის ფეხბურთის კონფედერაციამ — CONCACAF-მა და აზიის ფეხბურთის კონფედერაციამაც.
ფიფას შიგნითაც სერიოზული უთანხმოება წარმოიშვა. ორგანიზაციის მთავარმა საოპერაციო დირექტორმა კევინ ლამურმა პროექტს „ერთი ადამიანის ინიციატივა“ უწოდა და განაცხადა, რომ ადმინისტრაციის წევრები მისი დეტალების შესახებ შეცდომაში შეიყვანეს.
ინფანტინოს უფროსმა მრჩეველმა გლობალური სტრატეგიისა და მმართველობის საკითხებში, კარლოს კორდეირომ, თანამდებობა დატოვა. მისი შეფასებით, ინიციატივა „ფეხბურთისთვის ცუდი გარიგება“ იყო და სპორტის მომავალს საფრთხეს უქმნიდა.
გეგმის დამტკიცებას ფიფას 211 წევრიდან მინიმუმ 106-ის მხარდაჭერა სჭირდებოდა. თუმცა უეფას, CONCACAF-ისა და აზიის კონფედერაციის პოზიციების გათვალისწინებით, მის წინააღმდეგ შესაძლოა 136 ქვეყანა გამოსულიყო, რაც ინიციატივის მიღებას პრაქტიკულად შეუძლებელს ხდიდა.
ინფანტინომ აღნიშნა, რომ ახლა ყველა დაინტერესებული მხარის გაერთიანებას და საერთო ინტერესებზე დაფუძნებული დიალოგის აღდგენას შეეცდება.
სკანდალი ფიფას პრეზიდენტისთვის რთულ პერიოდში განვითარდა. ინფანტინო ორგანიზაციის ხელმძღვანელის პოსტზე მეოთხე ვადით არჩევას გეგმავს. არჩევნები ფიფას კონგრესზე, 2027 წლის მარტში, მაროკოში უნდა გაიმართოს. კანდიდატების წარდგენის ბოლო ვადა 18 ნოემბერია.
აქამდე ვარაუდობდნენ, რომ ინფანტინოს კონკურენტი არ ეყოლებოდა, თუმცა პროექტის გარშემო განვითარებულმა მოვლენებმა შესაძლოა მისი მხარდაჭერა მნიშვნელოვნად შეასუსტოს.
წყარო: CNN
