საქართველოს სტატისტიკის ეროვნული სამსახურის (საქსტატის) უახლესი მონაცემებით, 2026 წლის მეორე კვარტალში საქართველოში საერთაშორისო ვიზიტორების რაოდენობა წინა წლის ანალოგიურ პერიოდთან შედარებით 5.2%-ით შემცირდა. კლების ტენდენცია დაფიქსირდა როგორც ვიზიტორთა რაოდენობაში, ისე ტურიზმიდან მიღებულ შემოსავლებში, თუმცა გაიზარდა ვიზიტორთა კმაყოფილების დონე და ქვეყანაში გატარებული ღამეების საშუალო რაოდენობა.
საქსტატის ანგარიშის თანახმად, საანგარიშო პერიოდში საქართველოში 1.3 მილიონი საერთაშორისო ვიზიტორი შემოვიდა. მათგან 81.5% ტურისტი იყო, ანუ საქართველოში მინიმუმ ერთი ღამე გაათენა, 14.8% მხოლოდ ექსკურსანტი იყო, ხოლო 3.8% ორივე კატეგორიას მიეკუთვნებოდა.
ვიზიტორთა ყველაზე დიდი ნაწილი კვლავ მეზობელი ქვეყნებიდან შემოვიდა. პირველ ადგილზე რუსეთის ფედერაციაა 328.9 ათასი ვიზიტორით, რაც საერთო რაოდენობის 25.1%-ს შეადგენს. მას მოსდევს თურქეთი (16.9%) და სომხეთი (10.8%).
სტატისტიკის მიხედვით, საქართველოში ყველაზე ხშირად 31-დან 50 წლამდე ასაკის ადამიანები მოგზაურობენ, რომელთა წილი 45.6%-ია. ვიზიტორთა 57.1% მამაკაცია, ხოლო 42.9% — ქალი.
ვიზიტების თითქმის ნახევარი (49.6%) დასვენების, გართობისა და რეკრეაციის მიზნით განხორციელდა. მეგობრებისა და ნათესავების მოსანახულებლად საქართველოში ვიზიტორთა 25.6% ჩავიდა, ხოლო 12% ქვეყანას ტრანზიტულად ესტუმრა.
ყველაზე მოთხოვნად მიმართულებებად კვლავ თბილისი და აჭარის ავტონომიური რესპუბლიკა რჩება. ვიზიტების 36.9% დედაქალაქზე მოდის, ხოლო 26.2% — აჭარაზე.
ტურისტული ნაკადის შემცირება ეკონომიკურ მაჩვენებლებზეც აისახა. 2026 წლის მეორე კვარტალში უცხოელი ვიზიტორების ჯამურმა დანახარჯმა 3 მილიარდი ლარი შეადგინა, რაც წინა წლის ანალოგიურ პერიოდთან შედარებით 13.3%-ით ნაკლებია. ამავე პერიოდში 9.2%-ით შემცირდა ერთ ვიზიტზე საშუალო დანახარჯიც და 1 922.1 ლარი შეადგინა. ყველაზე დიდი წილი მოდის საკვებსა და სასმელზე (27.3%), საყიდლებზე (25.2%) და განთავსებაზე (24.3%).
მიუხედავად ვიზიტორთა რაოდენობისა და დანახარჯების შემცირებისა, საქსტატის მონაცემებით, უცხოელი სტუმრების კმაყოფილების დონე კვლავ მაღალია. გამოკითხულთა 54.4%-მა საქართველოში მოგზაურობა „ძალიან კმაყოფილად“ შეაფასა, ხოლო 38.7%-მა — „კმაყოფილად“, რაც ჯამურად 93.1%-ს შეადგენს.
ანგარიშის მიხედვით, გაიზარდა ქვეყანაში გატარებული ღამეების საშუალო რაოდენობაც — 5.30-დან 5.48 ღამემდე. ამასთან, ვიზიტების 81.8% განმეორებითი ხასიათისაა, რაც მიუთითებს, რომ საქართველოში ნამყოფი უცხოელი ვიზიტორების დიდი ნაწილი ქვეყანაში ხელახლა ბრუნდება.
