აშშ-ის პრეზიდენტის ადმინისტრაცია ცდილობს, გააფორმოს შეთანხმება აფრიკის, აზიისა და აღმოსავლეთ ევროპის იმ ქვეყნებთან, რომლებიც შეძლებენ აშშ-დან დეპორტირებული მიგრანტების მიღებას, ასეთთა შორის არიან მოლდოვა და კოსოვო.
ამის შესახებ „უოლ სთრით ჯორნალი“ წერს.
როგორც გამოცემა წერს, შეთანხმება იქნება ერთჯერადი და დაეფუძნება თებერვალში პანამასთან გაფორმებულ გარიგებას, რომლის ფარგლებშიც ახლო აღმოსავლეთის ქვეყნების 100-ზე მეტი მიგრანტი პანამაში გაგზავნეს.
„უოლ სთრით ჯორნალის“ ცნობით, იმ ქვეყნებს შორის, რომლებსაც მიგრანტების მიღების თხოვნით დონალდ ტრამპის ადმინისტრაციამ მიმართა, არიან ლიბია, რუანდა, ბენინი, მოლდოვა, მონღოლეთი და კოსოვო.
თეთრ სახლში იმედი აქვთ, რომ ეს ქვეყნები, ფინანსური შეთანხმების ან პოლიტიკური სარგებლის მიღების სანაცვლოდ, აშშ-დან მიგრანტების მიღებას დათანხმდებიან.
ამასთანავე, დონალდ ტრამპის ადმინისტრაცია ფიქრობს, რომ ლათინური ამერიკის ზოგიერთი ქვეყანა ასევე დათანხმება აშშ-თან გრძელვადიანი შეთანხმების გაფორმებას, რომლის მიხედვითაც ეს სახელმწიფოები აღიარებულები იქნებიან უსაფრთხო ქვეყნებად და მიგრანტები თავშესაფრის მოთხოვნას შეძლებენ.
როგორც „უოლ სთრით ჯორნალი“ წერს, აშშ ასეთი შეთანხმების გაფორმებასთან ახლოსაა კოსტა რიკასა და ჰონდურასთან.
