სტატისტიკის ეროვნული სამსახურის მონაცემებით, 2023 წლის პირველ კვარტალში შიდა ტურიზმიდან მიღებულმა შემოსავალმა 244.7 მილიონი ლარი შეადგინა, რაც გასული წლის ანალოგიური პერიოდის მაჩვენებელზე 16.5%-ით მეტია.
ამასთან, ვიზიტზე გაწეული საშუალო ხარჯი 10.4%-ით არის გაზრდილი და 167.9 ლარს უტოლდება.
ქვეყნის ტერიტორიაზე 15 წლის და უფროსი ასაკის ადგილობრივი ვიზიტორების საშუალო თვიური რაოდენობა ჯამში 1 174 800-ს შეადგენს.
ამავე ცნობით, მათ მიერ ქვეყნის ტერიტორიაზე განხორციელებული ვიზიტების საშუალო თვიური რაოდენობა 1 457 000-ით განისაზღვრა, რაც წინა წლის შესაბამისი პერიოდის მაჩვენებელს 5.6%-ით აღემატება.
პირველ კვარტალში ტურისტული ტიპის ვიზიტების საშუალო თვიური რაოდენობა 621 000-ით განისაზღვრა, რაც წინა წლის ანალოგიური პერიოდის მაჩვენებელზე 0.9%-ით ნაკლებია.
ვიზიტორების 36.5% 31-50 წლამდე ასაკობრივ კატეგორიას მიეკუთვნებოდა. ამასთან, ქალების რაოდენობა ვიზიტორების ჯამური რაოდენობის 53.4%-ს შეადგენდა.
გამოკვლევის შედეგების მიხედვით, ვიზიტორების 32.9% თბილისის მცხოვრებია, იმერეთის, რაჭა-ლეჩხუმისა და ქვემო სვანეთის რეგიონზე 17.2% მოდის, ქვემო ქართლზე -10.2%, ხოლო დანარჩენი რეგიონები სტრუქტურაში შედარებით დაბალი წილით არის წარმოდგენილი.
ვიზიტების უმრავლესობა (49.6%) მეგობრების/ნათესავების მონახულების მიზნით განხორციელდა.
საანგარიშო პერიოდში ყველაზე მეტი ვიზიტი თბილისსა და იმერეთში შედგა.
