საქართველოს მთავრობა ინოვაციური სტარტაპებისთვის საგადასახადო შეღავათების შემოღებაზე მუშაობს. ინიციატივის მიხედვით, ინოვაციური სტარტაპები შეღავათებით 10 წლის განმავლობაში ისარგებლებენ. პირველი სამი წლის განმავლობაში კი ნულოვანი საშემოსავლო გადასახადით დაიბეგრებიან. შესაბამისი ცვლილებები „ინოვაციების შესახებ“ კანონსა და ,,საგადასახადო კოდექსში“ შედის. რას ითვალისწინებს ინიციატივა? და რა შეღავათებით ისარგებლებენ ინოვაციური სტარტაპები? კითხვით კომერსანტმა ,,საქართველოს ინოვაციების და ტექნოლოგიების სააგენტოს’’ მიმართა.
,,საკანონმდებლო ინიციატივის თანახმად, ინოვაციური სტარტაპის სტატუსი გულისხმობს სტარტაპ გარემოს გაძლიერების მიზნით შემდეგი ხელშემწყობი მექანიზმების შემოღებას: ინოვაციური სტარტაპის სტატუსის მინიჭებიდან
- პირველი სამი წლის განმავლობაში ინოვაციური სტარტაპის მიერ გაცემული ხელფასი, თავისუფლდება საშემოსავლო გადასახადისაგან.
- მეოთხე წლიდან მომდევნო 3 წლის განმავლობაში ინოვაციური სტარტაპის მიერ გაცემული ხელფასი იბეგრება საშემოსავლო გადასახადის 5 პროცენტიანი განაკვეთით; ხოლო, ამავე პერიოდში ინოვაციური სტარტაპის მოგების გადასახადის განაკვეთია 5 პროცენტი.
- მეშვიდე წლიდან მომდევნო 4 წლის განმავლობაში ინოვაციური სტარტაპის მიერ გაცემული ხელფასი იბეგრება საშემოსავლო გადასახადის 10 პროცენტიანი განაკვეთით; ხოლო, ამავე პერიოდში ინოვაციური სტარტაპის მოგების გადასახადის განაკვეთია 10 პროცენტი.’’- განმარტავენ სააგენტოში.
,,საქართველოს ინოვაციების და ტექნოლოგიების სააგენტოში“ მიაჩნიათ, რომ ეს ინიციატივა ინოვაციურ სტარტაპებში ინვესტიციების ზრდას და ქვეყნის რეგიონალურ ინოვაციურ ჰაბად ჩამოყალიბებას შეუწყობს ხელს.
,,2014 წლიდან საქართველოს მთავრობის მხარდაჭერით საქართველოში ინოვაციური ეკოსისტემა დინამიკურად ვითარდება. სპეციალურად ამ მიზნით შეიქმნა სსიპ საქართველოს ინოვაციებისა და ტექნოლოგიების სააგენტო, რომლის მეშვეობითაც წლების განმავლობაში არაერთი პროგრამა განხორციელდა ქართული ინოვაციური სტარტაპების შექმნის, მათი განვითარების და გლობალურ ბაზრებზე გასვლის ხელშესაწყობად. თუმცა ინოვაციური ეკოსისტემის განვითარების ახალ ეტაპზე გადასასვლელად მნიშვნელოვანია დამატებითი მხარდაჭერა, მათ შორის, კანონმდებლობის დონეზე. წარმოდგენილი ინიციატივა, პირველ რიგში, ხელს შეუწყობს ინოვაციური სტარტაპ კომპანიების, იქ დასაქმებულთა და ქვეყანაში შემოსული ინვესტიციების მნიშვნელოვან ზრდას. ასევე იქნება მნიშვნელოვანი ნაბიჯი ჩვენი ქვეყნის რეგიონალურ ინოვაციურ ჰაბად ჩამოყალიბებისთვის - უცხოური სტარტაპების მოზიდვისთვის და მსხვილი საინვესტიციო ფონდების დაინტერესებისთვის. გარდა ამისა, აღნიშნული საკანონმდებლო ინიციატივა უზრუნველყოფს ინოვაციების შეღწევას ეკონომიკის ყველა სექტორში ინოვაციური სტარტაპების და ინოვაციური მცირე და საშუალო საწარმოების განვითარების ხელშეწყობით.’’- აცხადებენ სააგენტოში.
ინოვაციური სტარტაპის სტატუსით შეიძლება ისარგებლოს პირმა, რომელიც ქმნის ინოვაციურ პროდუქტს, პროცესს ან/და ეწევა ინოვაციურ მომსახურებას. ამასთან, კანონპროექტი ითვალისწინებს სხვა მოთხოვნებს, რაც დაკმაყოფილებული უნდა იყოს სტატუსის მოპოვების მიზნებისთვის. მათ შორის არის მოზიდული ინვესტიციის მინიმალური მოცულობა.
