ამერიკულმა ტექნოლოგიურმა გიგანტებმა ხელოვნური ინტელექტის სექტორში კაპიტალური დანახარჯების სახით უკვე ჯამურად $1.1 ტრილიონი გამოყვეს. სხვა სიტყვებით რომ ვთქვათ, Big Tech-ის კაპიტალურმა დანახარჯებმა AI ბუმის დაწყებიდან 1.1 ტრილიონ დოლარს მიაღწია.
Google-ის მშობელი Alphabet-ის, Amazon-ის, Microsoft-ისა და Meta-ს ერთობლივმა კაპიტალურმა დანახარჯებმა 2023 წლის დასაწყისიდან 2026 წლის ივნისის ბოლომდე 1.1 ტრილიონ დოლარს მიაღწია. ინფორმაციას Financial Times-ი კომპანიების ფინანსურ ანგარიშებზე დაყრდნობით ავრცელებს.
აღნიშნული თანხა ოთხი კომპანიის მთლიან კაპიტალურ დანახარჯებს მოიცავს და არა მხოლოდ ხელოვნურ ინტელექტში განხორციელებულ პირდაპირ ინვესტიციებს. თუმცა ხარჯების მკვეთრი ზრდა ძირითადად მონაცემთა ცენტრების მშენებლობას, მოწინავე ჩიპების შეძენას, სერვერებს, ქსელურ ინფრასტრუქტურასა და ელექტროენერგიის სიმძლავრეების უზრუნველყოფას უკავშირდება.
Financial Times-ის შეფასებით, ოთხი ტექნოლოგიური გიგანტი მხოლოდ 2026 წელს კაპიტალურ პროექტებზე დაახლოებით 745 მილიარდი დოლარის დახარჯვას გეგმავს. შედარებისთვის, მათი ერთობლივი კაპიტალური დანახარჯები 2025 წელს დაახლოებით 410 მილიარდ დოლარს შეადგენდა.
Amazon-მა 2026 წლის საინვესტიციო გეგმა დაახლოებით 220 მილიარდ დოლარამდე გაზარდა. Alphabet კაპიტალურ დანახარჯებზე 195 მილიარდიდან 205 მილიარდ დოლარამდე დახარჯვას გეგმავს, ხოლო Meta-ს პროგნოზი 130 მილიარდიდან 145 მილიარდ დოლარამდეა განსაზღვრული. კომპანიები ხარჯების ზრდას AI სერვისებზე და ღრუბლოვან გამოთვლით სიმძლავრეებზე მოთხოვნის მატებით ხსნიან.
ინვესტიციების მასშტაბმა კომპანიების თავისუფალ ფულად ნაკადზე ზეწოლა გაზარდა. Financial Times-ის თანახმად, 2026 წლის მეორე კვარტალში ოთხი ჯგუფის ერთობლივი თავისუფალი ფულადი ნაკადი დაახლოებით 7 მილიარდ დოლარამდე შემცირდა, რაც ბოლო ათწლეულის ყველაზე დაბალი მაჩვენებელია.
ამავე დროს, Amazon-ის, Microsoft-ისა და Google-ის ღრუბლოვანი ბიზნესების შემოსავლები იზრდება, რაც მიუთითებს, რომ AI ინფრასტრუქტურაზე განხორციელებული ინვესტიციების ნაწილი უკვე კომერციულ შედეგებში აისახება. თუმცა ინვესტორებისთვის მთავარ კითხვად რჩება, რამდენად სწრაფად შეძლებენ კომპანიები ასეულობით მილიარდი დოლარის დანახარჯების შესაბამის მოგებად გარდაქმნას.
წყაროები:
Financial Times:
https://www.ft.com/content/dcf3873e-7b32-4a24-a90d-3bccf1d2c996
Reuters, Amazon-ის 2026 წლის კაპიტალური დანახარჯები:
https://www.reuters.com/business/retail-consumer/amazon-beats-estimates-quarterly-cloud-revenue-growth-2026-07-30/
Reuters, Meta-ს კაპიტალური დანახარჯები და თავისუფალი ფულადი ნაკადი:
https://www.reuters.com/business/meta-narrows-annual-capex-forecast-ai-buildout-grows-2026-07-29/
Reuters, Alphabet-ის საინვესტიციო გეგმა:
https://www.reuters.com/business/google-quarterly-cloud-revenue-growth-beats-expectations-2026-07-22/
Alphabet-ის ოფიციალური მეორე კვარტლის ანგარიში:
https://abc.xyz/investor/events/event-details/2026/2026-Q2-Earnings-Call-2026-GgTAq7Is0z/default.aspx
Meta-ს ოფიციალური ინვესტორთა გვერდი:
https://investor.atmeta.com/
