55 Cancri e, ასევე ცნობილი, როგორც Janssen ეგზოპლანეტაა, რომელიც მზის მსგავსი ვარსკვლავის, 55 Cancri A-ს გარშემო ბრუნავს. ეგზოპლანეტის მასა დედამიწას დაახლოებით რვაჯერ აღემატება. ვარსკვლავთან სიახლოვის გამო, 55 Cancri e უკიდურესად ცხელია - დღის განმავლობაში ტემპერატურა 3000 კელვინს აჭარბებს.
ვარაუდობენ, რომ 55 Cancri e ნახშირბადის პლანეტა იყო, თუმცა, ბოლოდროინდელი კვლევების თანახმად, ის შესაძლოა, საფირონით იყოს სავსე.
"ეს ცხელი პლანეტა ლავის ოკეანითაა დაფარული" - წერს NASA.
- პლანეტა პირველად 2004 წელს აღმოაჩინეს. მაღალი ტემპერატურა კი მზის მსგავს ვარსკვლავთან სიახლოვითაა განპირობებული. სინამდვილეში, მისი ვარსკვლავამდე საშუალო მანძილი მხოლოდ 1,4 მილიონი მილია. შედარებისთვის, დედამიწა მზიდან დაახლოებით 93 მილიონი მილის დაშორებით მდებარეობს.
"ის საკმარისად კაშკაშაა, რომ შეუიარაღებელი თვალითაც კი დავინახოთ. ვარსკვლავი პლანეტის ცაზე 70-ჯერ უფრო ფართოდ გამოჩნდება, ვიდრე მზე ჩვენს ცაზე. ტემპერატურა მნიშვნელოვნად იცვლება 55 Cancri e-ზე, რაც შესაძლოა ვულკანური აქტივობით იყოს გამოწვეული."
ჟურნალ „Nature“-ში გამოქვეყნებული სტატიის ავტორები მიიჩნევენ, რომ პლანეტაზე არსებული უზარმაზარი მაგმის ოკეანე ამ ატმოსფეროს შენარჩუნებისთვის საჭირო გაზს გამოყოფს.
პლანეტის პირველი ატმოსფერო, სავარაუდოდ, ვარსკვლავიდან წამოსულმა რადიაციამ გაანადგურა. "ნასამ" ასევე განაცხადა, რომ პლანეტაზე შესაძლოა არსებობდეს „ლავის პაწაწინა წვეთებისგან შემდგარი ღრუბლები“.
