პუტინმა საქართველოს მოქალაქეებს სასჯელი გაუუქმა, ასე გამოეხმაურა პარტია „ქართული ოცნების“ თავმჯდომარე ირაკლი კობახიძემ რუსეთ-საქართველოს შორის სავიზო რეჟიმის გაუქმებას და პირდაპირი ფრენების აღდგენას. მისი თქმით 2019 წელს პუტინმა ქართველი ხალხი დაასანქცირა, დასაჯა, ახლა კი ეს „სასჯელი მოუხსნა“.
„2019 წელს რუსეთის ფედერაციამ სანქცია დაუწესა საქართველოს მოქალაქეებს, დასაჯა საქართველოს მოქალაქეები და ამას ემსახურებოდა სავიზო რეჟიმის დაწესება და ფრენების შეზღუდვა. ეს იყო ცალმხრივი გადაწყვეტილება და ახლა კიდევ ერთხელ რუსეთის ფედერაციამ მიიღო მორიგი ცალმხრივი გადაწყვეტილება და ეს სასჯელი გაუუქმა საქართველოს მოქალაქეებს,“ - განაცხადა კობახიძემ.
მისი თქმით, ხელისუფლების კონსტიტუციური ვალია ხელი შეუწყოს დიასპორის კავშირს საქართველოსთან და ამ პირობებში რუსეთისთვის სანქციების დაწესებაზე საუბარი მიუღებელია.
„გვინდა კიდევ ერთხელ ხაზი გავუსვათ ჩვენს კონსტიტუციურ ვალდებულებას, რომ ხელი უნდა შევუწყოთ, და არა თუ შევუშალოთ, დიასპორის კავშირს საქართველოსთან, საკუთარ სამშობლოსთან. ამ პირობებში მით უმეტეს მიუღებელია საუბარი რუსეთისთვის სანქციების დაწესებაზე. რუსეთისთვის სანქციების დაწესებით დავსჯით საკუთარ ხალხს და საკუთარ ქვეყანას. როდესაც ოპოზიცია ასეთ რაღაცებზე საუბრობს, ეს მიუთითებს იმაზე, რომ ისინი მოქმედებენ საკუთარი ქვეყნის და საკუთარი ხალხის წინააღმდეგ, რაც ჩვენთვის არის მიუღებელი.
რაც შეეხება ფრენებს, არაერთი ქვეყანაა, სადაც არის ფრენები. მათ აქვთ პარტნიორობა დასავლეთთან, თუმცა აქვთ ფრენები რუსეთის ფედერაციასთან, მათ შორის, არის ისრაელი, რომელიც არის აშშ-ის სტრატეგიული პარტნიორი და აქვს პირდაპირი ფრენები რუსეთთან, ასევე არის თურქეთი, რომელიც არის ევროკავშირის წევრობის კანდიდატი და NATO-ს წევრი ქვეყანა და იქაც ხორციელდება ფრენები, ჩვენს მეზობელ აზერბაიჯანსა და სომხეთშიც არის ფრენები. მთლიანობაში ეს ყველაფერი მიუთითებს იმაზე, რომ სპეკულაციებშიც არ არსებობს არავითარი საფუძველი. ისე ცდილობს ოპოზიცია წარმოაჩინოს ეს ყველაფერი, თითქოს პირდაპირი ფრენების ცალმხრივად აღდგენა რუსეთის მხრიდან, ნიშნავს სტრატეგიული პარტნიორობის დამყარებას. ასეთი სპეკულაციებიც კი გვესმის პირდაპირი თუ ირიბი ფორმით. რა თქმა უნდა, ეს ასე არ არის, არავითარი კავშირი ფრენების აღდგენას, სავიზო რეჟიმის გაუქმებასა და სტრატეგიულ პარტნიორობას შორის არ არის. ეს რომ ასე იყოს, აშშ-ს აქამდე ექნებოდა დაწესებული პირდაპირი ფრენები, ან გაუმარტივებდა ჩვენს მოქალაქეებს სავიზო რეჟიმს, თუმცა საკმაოდ მკაცრი რეჟიმი მოქმედებს ჩვენი მოქალაქეების მიმართ“, - განაცხადა ირაკლი კობახიძემ.
