ჩვენ მზად ვართ, ევროსაბჭოს გავუზიაროთ ჩვენი გამოცდილება უცხოურ გავლენასთან ბრძოლის მიმართულებით, - განუცხადა მედიას საქართველოს პრემიერ-მინისტრმა ირაკლი კობახიძემ.
მთავრობის მეთაურის განმარტებით, საქართველოს რეალურად აქვს ერთ-ერთი საუკეთესო გამოცდილება უცხოურ გავლენასთან ბრძოლის მიმართულებით.
„ჩვენ მოხარული ვართ, რომ ასეთი ინტერესი აქვს ევროსაბჭოს - საქართველოს რეალურად აქვს ერთ-ერთი საუკეთესო გამოცდილება უცხოურ გავლენასთან ბრძოლის მიმართულებით, თქვენ იცით, რომ გამჭვირვალობის კანონი ემსახურერბოდა ზუსტად ამ მიზანს და შემდგომი კანონმდებლობაც ემსახურება ზუსტად ამ მიზანს. რა თქმა უნდა, ჩვენ მზად ვართ, ევროსაბჭოს გავუზიაროთ ჩვენი გამოცდილება უცხოურ გავლენასთან ბრძოლის მიმართულებით“.- განაცხადა კობახიძემ.
კობახიძემ ისაუბრა „გრანტების შესახებ“ და რიგ კანონებში დაგეგმილ საკანონმდებლო ცვლილებებზეც და დასძინა, რომ „იყვნენ კონკრეტული „ენჯეოები“, რომლებსაც არ უნდოდათ, რქმეოდათ უცხოური ძალის გავლენის წარმომადგენლები და ამ დროს პირდაპირ უცხოურ ძალებად დარეგისტრირდნენ, მაგალითად ესტონეთში და კანონპროექტი, რომელიც დაინიცირდა, არსებითად ემსახურება ამ გვერდის ავლის მექანიზმების განეიტრალებას“.
„იყო კანონის გვერდის ავლის შესაძლებლობები. ის კანონპროექტი, რომელიც დაინიცირდა, არსებითად ემსახურება ამ გვერდის ავლის მექანიზმების განეიტრალებას. იყვნენ კონკრეტული ენჯეოები, რომლებსაც არ უნდოდათ, რქმეოდათ უცხოური ძალის გავლენის წარმომადგენლები და ამ დროს პირდაპირ უცხოურ ძალებად დარეგისტრირდნენ, მაგალითად ესტონეთში. ეს არის კანონის გვერდის ავლის მცდელობა და ამას უნდა დაუპირისპირდეს კანონი, რომელიც არის ინიცირებული", - განაცხადა კობახიძემ.
შეგახსენებთ, პარლამენტის ევროპასთან ინტეგრაციის კომიტეტის თავმჯდომარის, ლევან მახაშვილის ინფორმაციით, ევროსაბჭომ საქართველოს უცხოური ჩარევის წინააღმდეგ ბრძოლისთვის გამოცდილების გაზიარება სთხოვა. მახაშვილი თქმით, ევროსაბჭოს აინტერესებს, რა გამოცდილება აქვს საქართველოს ამ მიმართულებით. მახაშვილის ინფორმაციით, მათ გამოცდილებას, კანონმდებლობას, ნაბიჯებს და გადაწყვეტილებებს უკვე თავი მოუყარეს და ამ მიმართულებით გატარებული საკანონმდებლო ცვლილებების პაკეტი ევროსაბჭოს გადასცეს.
