გამოცემა Times of Israel წერს, რომ ისრაელელმა მეცნიერებმა ფილტვის კიბოს გამოსავლენად სისხლის ექსპერიმენტული ტესტი შექმნეს, რომელიც ძვირადღირებულ დნმ-ის სეკვენირებას არ საჭიროებს. კვლევის პირობებში ერთი ნიმუშის ანალიზი დაახლოებით $60 ღირს და პროცედურა ორ-სამ დღეს მოითხოვს.
კონცეფციის დამადასტურებელ კვლევაში 103 ადამიანი მონაწილეობდა – ფილტვის კიბოს II–IV სტადიის მქონე 51 პაციენტი და შესაბამისი ასაკის 52 ჯანმრთელი ადამიანი. დამოუკიდებელი ბრმა შემოწმებისას ტესტმა კიბოს შემთხვევების 93.1% სწორად გამოავლინა, ხოლო ჯანმრთელი საკონტროლო ჯგუფის წევრთა 90.3% სწორად კლასიფიცირდა.
ტესტი სისხლში არსებული დნმ-ის ფრაგმენტებში კიბოსთვის დამახასიათებელ ქიმიურ ცვლილებებს ფლუორესცენტული მონიშვნისა და სპეციალური მიკროჩიპის საშუალებით აანალიზებს.
კვლევას თელ-ავივის უნივერსიტეტის მეცნიერები JaxBio Technologies-სა და ისრაელის რამდენიმე სამედიცინო ცენტრთან თანამშრომლობით ატარებდნენ. შედეგები რეცენზირებად სამეცნიერო ჟურნალ npj Precision Oncology-ში გამოქვეყნდა.
"ადამიანების უმეტესობა დაავადების ბოლო სტადიებზე მოდის. თუ მას ადრეულ ეტაპზე აღმოვაჩენთ, შეგვიძლია ქირურგიულ ჩარევას მივმართოთ და სრულ განკურნებამდე მივიდეთ." – თქვა კვლევის წამყვანმა ავტორმა და Bnai Zion-ის სამედიცინო ცენტრის ონკოლოგიის დეპარტამენტის დირექტორმა აბედ აგბარიამ.
მეთოდი ჯერჯერობით ექსპერიმენტულ ეტაპზეა. კვლევაში ფილტვის კიბოს პირველი სტადიის მქონე პაციენტები არ მონაწილეობდნენ, ამიტომ, ტესტის ეფექტიანობა დაავადების ყველაზე ადრეულ ეტაპზე ჯერ დადასტურებული არ არის.
გამოცემის ცნობით, უფრო ფართომასშტაბური გამოცდა ისრაელისა და ევროპის რამდენიმე საავადმყოფოში მიმდინარეობს და მისი დასრულება 2027 წლის შუა პერიოდისთვის იგეგმება.
ჯანმრთელობის მსოფლიო ორგანიზაციის მონაცემებით, ფილტვის კიბო მსოფლიოში კიბოთი გამოწვეული სიკვდილიანობის მთავარი მიზეზია – 2022 წელს მას დაახლოებით 1.8 მილიონი ადამიანი ემსხვერპლა.
