რამდენიმე დღის წინ ავტორიტეტულმა აზერბაიჯანულმა გამოცემამ საქართველოზე და მის წვლილზე ზანგეზურის პროექტის განვითარებაში, ვრცელი და კრიტიკული სტატია გამოაქვეყნა.
აზერბაიჯანული მედიის ჟურნალისტი ჰყვებოდა, რომ 20 დღეზე მეტია, საქართველო-აზერბაიჯანის საზღვარზე აზერბაიჯანელი სატვირთოს მძღოლები დაყოვნებული არიან- ქართულ სატვირთო მანქანებს საბაჟოებზე გავლის უფლება ეძლევათ, ხოლო აზერბაიჯანული სატვირთო მანქანების შეფერხების მიზეზები არ კონკრეტდება. აზერბაიჯანული მძღოლები გავრცელებულ კადრებში ამბობენ, რომ ქართველი მებაჟეები ხშირად უხეშად ექცევიან, რაც შესაძლოა რუსულ და სომხურ ინტერესებზეც მიუთითებდეს.
გარდა ტექნიკური შეფერხებებისა, აზერბაიჯანული მხარე აღნიშნავს, საქართველო ზანგეზურის დერეფანს შუა დერეფნის კონკურენტად განიხილავს, რომელიც რეგიონში აქამდე არსებულ ინფრასტრუქტურულ ბალანსს შეცვლის.
,,ათწლეულების განმავლობაში საქართველოში კონცენტრირებული ლოგისტიკური მონოპოლიის ფონზე, ალტერნატიული გზის გაჩენის შესაძლებლობა თბილისში მტკივნეულად აღიქმება”,- აღნიშნულია Caliber-ის სტატიაში.
სატრანსპორტო დერეფნის კვლევის ცენტრის დირექტორის პაატა ცაგარეიშვილის შეფასებით, მართალია, ზანგეზურის დერეფანი საქართველოს სატრანსპორტო სტრატეგიაში კონკურენტად ჩნდება და გარკვეულ ტვირთებს თავისკენ მიიზიდავს, თუმცა ეს მოცემულობა საშუალებას გვაძლევს, დანაკლისი სხვა მიმართულებებიდან დავაკომპესიროთ.
ცაგარეიშვილი განმარტავს, რომ ქართული მხარე რეგიონში ინფრასტრუქტურული პროექტების გასავითარებლად მეტად უნდა დაიხარჯოს.
„ზანგეზურის დერეფანს თუ საქართველოს კონტექსტში განვიხილავთ, რა თქმა უნდა, იგი ჩვენი შუა დერეფნის კონკურენტია და იგი გარკვეულ ტვირთებს თავის მხარეს გადაიტანს. თუმცა ეს რეალობა გვაძლევს შესაძლებლობას, რომ სხვა ტვირთები მოვიზიდოთ და დანაკლისი დავაკომპესიროთ.
აზერბაიჯანის მხარე ზოგადად ინფრასტრუქტურის განვითარებაზე ბევრს მუშაობს. თუნდაც ბაქო-თბილისი-ყარსის გზა, რომლის განვითარებაც ახლა შეფერხებულია, აზერბაიჯანს რამდენიმე მილიონი დაუჯდა. ამ პროექტზე 800 მილიონი დოლარი დაიხარჯა და ის ეფექტი, რომელიც უნდა ჰქონოდა, არ ჩანს.
ამ დროისთვის ზანგეზურის დერეფნის პროექტი ჯერ კიდევ არ არსებობდა.
სინქრონიზაციის მომენტი, რომელიც აუცილებელია, რომ ყველა სახელმწიფომ საკუთარი წვლილი გაიღოს და შესაბამისად მოგებაც მიიღოს, საქართველოს მიმართ დარღვეულია.
ყაზახური მხარეც კი ძალიან აქტიურად მუშაობს ამ პროექტის განვითარებისთვის, მუდმივად აახლებენ საკუთარ პორტებს, ქართულ მხარეს რაც შეეხება, ანაკლიის პორტის განვითარებისთვის ბიუჯეტიდან 50 მილიონი ლარიღაა შემორჩენილი, რაც ტექნიკური სამუშაოების ჩასატარებლად არ იქნება საკმარისი, არათუ რაიმე პროექტის დასაწყებად.
ამიტომ ის შეხედულება, რომ ჩემ მიერ ჩადებულ ინვესტიციას უკან ვერ ვიბრუნებ, რადგან ქართული მხარე საკმარისად არ მუშაობს, დღეს თუ არა ხვალ იფეთქებს“,- აღნიშნა პაატა ცაგარეიშვილმა.
რაც შეეხება საზღვარზე არსებულ რიგებს, ცაგარეიშვილი განმარტავს, რომ რიგები არა მხოლოდ კონკრეტულ პუნქტზეა, არამედ ზოგადად საქართველოს ყველა სახმელეთო საზღვარზე, რაც მეტწილად მებაჟეების სიმცირით არის განპირობებული.
„რაც შეეხება აზერბაიჯანელი მძღოლების უკმაყოფილებას, რომ საზღვარზე 20-დღიანი დაყოვნებაა და აზერბაიჯანელ მძღოლებს უთანასწოროდ ექცევიან, ეს ურთიერთგამომრიცხავი განცხადებებია. არა მხოლოდ საქართველო-აზერბაიჯანის საზღვარზე არის რიგების პრობლემა, არამედ ზემო ლარსშიც. ქართველი მძღოლებიც, რომლებიც გადაზიდვებს ახორციელებენ ყველა საზღვარზე ყოვნდებიან, რაც მებაჟეების არასაკმარისი რაოდენობით არის გამოწვეული“,- აღნიშნა სატრანსპორტო დერეფნის კვლევის ცენტრის დირექტორმა პაატა ცაგარეიშვილმა “კომერსანტთან” ინტერვიუში.
