საქართველოს მთავრობის განკარგულების საფუძველზე, ინფრასტრუქტურის სამინისტროს საავტომობილო გზების დეპარტამენტმა საერთაშორისო ავტომაგისტრალების მიმდებარედ ლანდშაფტის აღდგენისა და გაუმჯობესების საპროექტო-სახარჯთაღრიცხვო დოკუმენტაციის მომზადების მიზნით ტენდერი გამოაცხადა - ინფორმაციას გზების დეპარტამენტი ავრცელებს.
„მომსახურების შესყიდვის პროცესი განხორციელდება მსოფლიო ბანკის შესყიდვების პროცედურების მიხედვით, ხოლო მომსახურების ვადა 10 თვეს შეადგენს.
პროექტი დაყოფილია ოთხ ნაწილად და მოიცავს შემდეგ მონაკვეთებს: თბილისი–ზესტაფონი (არგვეთა); ზესტაფონი (არგვეთა)–ქუთაისი–სამტრედია; სამტრედია–გრიგოლეთი, გრიგოლეთი–ქობულეთი და ბათუმის შემოვლითი გზა; თბილისი–ბაკურციხე–ლაგოდეხის საერთაშორისო მაგისტრალი.
საკონსულტაციო მომსახურების ფარგლებში შესრულდება კვლევები და მოხდება იმ ადგილების იდენტიფიცირება, სადაც შესაძლებელია ლანდშაფტის აღდგენა და გაუმჯობესება. შემდეგ ეტაპზე მომზადდება დეტალური საპროექტო-სახარჯთაღრიცხვო დოკუმენტაცია.
კონსულტანტის ვალდებულებები მოიცავს: ფუნქციური, ესთეტიური და ეკოლოგიურად მდგრადი ლანდშაფტური დიზაინის შემუშავებას, რომელიც შეესაბამება საერთაშორისო სტანდარტებს; გზების მიმდებარე გარემოს ვიზუალური ხაზის გაუმჯობესებასა და ეკოსისტემის ინტეგრაციას; უსაფრთხოების და გარემოს დაცვის ნორმების დაცვას; ხმაურის დონის შემცირების, ფერდობების სტაბილიზაციის, ქარსაფარი ზოლების მოწყობისა და წყალამრიდების სისტემების გაუმჯობესების უზრუნველყოფას.
ტენდერის დეტალური ინფორმაცია ხელმისაწვდომია ქართულ და ინგლისურ ენაზე ბმულზე:
https://www.georoad.ge/?lang=geo&act=tenders&func=menu&uid=1755868866
https://www.georoad.ge/?lang=geo&act=tenders&func=menu&uid=1755869226
https://www.georoad.ge/?lang=geo&act=tenders&func=menu&uid=1755869548
https://www.georoad.ge/?lang=geo&act=tenders&func=menu&uid=1755869779“ - ნათქვამია ინფორმაციაში.
