53 წლის ზურაბ პატარაძე აჭარის მთავრობის თავმჯდომარედ მეორედ წარადგინა „ოცნებამ“. მთავრობის თავმჯდომარის პოსტზე ხელმეორედ წარდგენისას, ზურაბ პატარაძემ მადლობა გადაუხადა ბიძინა ივანიშვილს. „განსაკუთრებულად დიდი მადლობა მინდა გადავუხადო ჩვენი პარტიის საპატიო თავმჯდომარეს, ბატონ ბიძინა ივანიშვილს, რომელმაც ძალიან დიდი წვლილი შეიტანა ჩვენი ქვეყნის აღმშენებლობაში“, – განაცხადა მან.
პატარაძე აჭარის მთავრობის თავმჯდომარის პოსტს 2016-2018 წლებში იკავებდა. 2018 წლიდან დღემდე კი საქართველოს საგანგებო და სრულუფლებიანი ელჩი იყო აზერბაიჯანში.
რა ქონება და შემოსავალი აქვთ ზურაბ პატარაძესა და მისი ოჯახის წევრებს მის მიერ შევსებული დეკლარაციის მიხედვით?
ბოლო დეკლარაციების მიხედვით, ზურაბ პატარაძემ და მისმა ოჯახმა სხვადასხვა წყაროდან მნიშვნელოვანი შემოსავლები მიიღეს. მათ შორის დეკლარაციაში ასახულია ოჯახის წევრებისგან მიღებული საჩუქრები, ხელფასები და უძრავი ქონების შეძენა. მასალაში წერია, რომ 2024 წლის დეკლარაციის მიხედვით, ზურაბ პატარაძემ დედისგან მიიღო 65 000 დოლარი, სიდედრისგან 75 000 დოლარი, ხოლო შვილისგან 27 000 დოლარი, რაც ჯამურად 167 000 დოლარს შეადგენს. მოგვიანებით 2025 წლის დეკლარაციაშიც ფიქსირდება დამატებითი თანხები.
ზურაბ პატარაძე იმ პერიოდში მუშაობდა საქართველოს ელჩად აზერბაიჯანში და დეკლარაციაში ხელფასის სახით ათობით ათასი დოლარისა და ლარის შემოსავალი აქვს მითითებული. პარალელურად დეკლარაციაში ფიქსირდება 200 000 დოლარის იპოთეკური სესხიც, რაც მნიშვნელოვან ფინანსურ ვალდებულებაზე მიუთითებს.
დეკლარაციის მიხედვით, ოჯახის სახელზე მითითებულია ბინა თბილისში, ქონება ქობულეთში, ხოლო მეუღლის სახელზე წავკისში 380 000 დოლარად შეძენილი მიწა და საცხოვრებელი სახლი. გამოცემა წერს, რომ ქონება შეძენილია ნაწილობრივ სესხით და ოჯახისგან მიღებული თანხებით.
მიუხედავად მსხვილი ხარჯებისა, დეკლარაციებში მითითებულია გარკვეული დანაზოგებიც — ნაღდი ფული და საბანკო ანგარიშებზე თანხები. ეს აჩვენებს, რომ ოჯახს მიმდინარე შემოსავლების პარალელურად ფინანსური რეზერვებიც ჰქონდა.
