„ფინანსებზე ხელმისაწვდომობა ყველა ბიზნესისთვის პრობლემურია“, - ამის შესახებ „ბიზნესპრესნიუსთან“ მცირე და საშუალო ბიზნეს ასოციაციის თავმჯდომარემ მიხეილ ჭელიძემ განაცხადა.
ჭელიძემ ყურადღება სამშენებლო სექტორის მაგალითზე გაამახვილა და თქვა, რომ დეველოპერული პროექტების დაფინანსებით კუთხით, ბანკები ხედავენ რისკებს, რადგან გაზრდილია პროექტები და შემცირებულია მოთხოვნა. მისი თქმით, აღნიშნულის გამო, ბანკებს დაკრედიტება შეჩერებული აქვთ, რაც ბიზნესისთვის გამოწვევაა.
„ფინანსებზე ხელმისაწვდომობა ყველა ბიზნესისთვის პრობლემურია, აქ სახელმწიფო პროგრამების - „აწარმოე საქართველოში“ და „დანერგე მომავალის“ როლი მნიშვნელოვანია. სექტორულად თუ განვიხილავთ, დეველოპერულ პროექტებში ვინც არიან ჩართულები, მათ აქვთ პრობლემა, რადგან ბანკებმა გააჩერეს დაკრედიტება, იქიდან გამომდინარე, რომ ბაზარზე უძრავი ქონების დიდი მიწოდებაა.
დაახლოებით 12% აქვთ პორტფელში ბანკებს იპოთეკური სესხები გაცემული, რაც ძალიან დიდი მაჩვენებელია, რადგან, ზოგადად, 5-6%-ის ფარგლებშია ხოლმე. ბანკებმა შეაჩერეს დაკრედიტება, რომ მიწოდება გარკვეულწილად დასტაბილურდეს და ფასები არ დაეცეს. უძრავ ქონებაზე მოთხოვნა შემცირებულია, მიწოდება და რისკები კი გაზრდილია. ისეთ სამშენებლო ბიზნესს, რომელიც უკვე დაფინანსებულია, ლიკვიდურობაზე შესაძლოა, შეექმნას პრობლემა, აქედან გამომდინარე, დაკრედიტება შეაჩერეს“, - აღნიშნავს ჭელიძე.
ამასთანავე, ჭელიძე აღნიშნავს, რომ პრობლემები არსებობს ტურიზმის სექტორშიც, თუმცა, მიმდინარე წლისთვის ცუდი მოლოდინები არ აქვთ.
„ტურიზმის სექტორს ვინც ემსახურება, მათ აქვთ გარკვეული პრობლემები. ეს გამოწვეულია იმით, რომ სეზონი არ იყო, შემდეგ დაემთხვა პოლიტიკური მოვლენები და მხარჯველუნარიანი ტურისტის შემოდინება შემცირდა. კაფეებსა და რესტორნებს სერიოზულად შეუმცირდათ რეალიზაცია. თუმცა ეს გარდამავალი პროცესია, ვესაუბრეთ ტურიზმის ასოციაციას და მოლოდინები წლევანდელ სეზონზე არ არის „ცუდი“, - განაცხადა მიხეილ ჭელიძემ.
