ეროვნული ბანკის მიერ მყისიერი გადახდების სისტემის დანერგვის შესახებ გავრცელებულ ინფორმაციას ინტერპრეტაციები მოჰყვა. მედიაში აქტიურად განიხილებოდა, რომ საქართველოში საგადახდო სისტემების - VISA და MASTERCARD-ის საქმიანობის შეზღუდვა იგეგმება. აღნიშნული ინფორმაცია ეროვნულმა ბანკმა უარყო.
საკითხზე ,,კომერსანტმა“ კომენტარი ,,საქართველოს საბანკო ასოციაციის პრეზიდენტს’’ სთხოვა. ალექსანდრე ძნელაძე განმარტავს, რომ არც ერთი სისტემა, რაზეც დღეს მიმდინარეობს საუბარი Visa – Mastercard-ის ჩამნაცვლებელი არ არის. მისი განმარტებით, მყისიერი გადახდების სისტემა საგადახდო სისტემა არ არის და ის ერთი ბანკიდან მეორეში განხორციელებული გადარიცხვების უმოკლეს ვადაში ასახვას უზრუნველყოფს.
,,ეროვნულმა ბანკმა ძალიან ზუსტი და კონკრეტული ახსნა დადო და განმარტება გააკეთა. არც გამიგია, რომ თეორიულად ამაზე იყოს საუბარი, რომ Visa და Mastercard-ი გავიდნენ. ძალიან ზუსტი, კონკრეტული და სრულფასოვანი ახსნა-განმარტება გააკეთა ამასთან დაკავშირებით ეროვნულმა ბანკმა. არც ერთი სისტემა დღეს რაზეც მიმდინარეობს საუბარი (მყისიერი გადახდების სისტემა, 24 საათიანი RTGS, ღია ბანკინგი) არანაირად Visa – Mastercard-ის ჩამნაცვლებელი არ არის. ეს არ არის საგადახდო სისტემა. ღია ბანკინგი არის საკმაოდ ვრცელი და მოიცავს ღია ბანკინგს, ღია ფინანსებს, ღია ინფორმაციას, რომელიც უზრუნველყოფს მომხმარებლისთვის ინფორმაციისა და მომსახურების მიწოდებას. მყისიერი გადარიცხვის სისტემა გადარიცხვების მყისიერად ასახვას უზრუნველყოფს. ეს ცალკეულად საგადახდო სისტემა არ არის. Visa – Mastercard-ის გადახდის პროცესად იქნება RTGS-ის გადარიცხული თანხა, იქნება Swift-ით გადარიცხული თანხა, თუ მყისიერი გადახდით, ეს ერთ-ერთი კომპონენტია. ვსაუბრობთ ცალკეულ კომპონენტებზე, რომელიც ერთმანეთის ჩამნაცვლებლად არ უნდა მოვიხსენიოთ. ყველა ახალი ინიციატივა, ყველა ახალი ინოვაციური პროდუქტი არის კარგი და შესაძლებელია რაღაც სახით და ფორმით ამარტივებდეს ან აუმჯობესებდეს ოპერაციებს, მაგრამ ეს ცალკეული კომპონენტებია. მყისიერი გადახდის სისტემა, მოკლედ რომ ავხსნათ, არის გადარიცხვა, რომელიც აისახება მომენტალურად“, - განმარტავს ალექსანდრე ძნელაძე.
